Jackie magpapaka-daring uli sa men's mag

Si Jackie Rice ang cover ng July issue ng FHM, her second time dahil una siyang nag-cover noong January 2012. Natatandaan naming napaka-sexy ng aktres sa una niyang FHM cover, tingnan natin kung mas daring siya ngayon.

Tamang-tama dahil isa si Jackie sa cast ng afternoon soap ng GMA 7 na Kasalanan Bang Ibigin Ka? bilang babaing pinag-aagawan ng mag-amang Michael de Mesa at Geoff Eigenmann.

Samantala, cover naman ng July issue ng Mega Magazine ang iba pang GMA Artist Center talents na sina Kris Bernal, Bela Padilla, Sarah Lahbati, at Alden Richards. Si Alden palang ang second guy na magko-cover sa nabanggit na magazine.

Iza bisi-bisihan

Ang Sayang na version ni Zsa Zsa Padilla ang theme song ng Kahit Puso’y Sinugatan, ang soap ng ABS-CBN na pagtatambalan nina Gabby Concepcion at Iza Calzado. Narinig namin ang version ni Zsa Zsa nang patugtugin ni Noel Ferrer sa Showbiz Rampa show niya sa WOW FM, ang ganda-ganda ng version ng singer-actress at tama si Noel na bagay sa buhay ni Zsa Zsa.

Anyway, sa second week na ng July ang alis ni Iza for Barcelona, Spain para sa pictorial niya sa anniversary issue ng Metro Magazine. Isusunod nito ang pictorial para sa Uniqlo sa third week ng July at sa Japan naman gagawin.

Busy pa rin si Iza pagbalik niya dahil may entry siya sa 2012 Cinemalaya, ang Mga Mumunting Lihim sa direction ni Joey Reyes. Kasama ni Iza rito sina Judy Ann Santos, Agot Isidro, at Janice de Belen.

Julie Anne ire-revive ang kanta ni Dina

May music video shoot sa Sunday (July 1) si Julie Anne San Jose para sa song niyang I’ll Be There na theme song ng Korean novela na Lie to Me. Sa July 8, ang launching ng music video sa Party Pilipinas. Sila rin ni Elmo Magalona ang magkasama sa music video na ididirek ni Mark Reyes.

Si Julie Anne rin ang kakanta ng theme song ng launching movie nila ni Elmo sa GMA Films na Just One Summer. Ang remake ng Dina Bonnevie hit na Bakit Ba Ganyan? ang theme song.

Derrick at Kristoffer ipapareha kina Barbie at Bea

Malapit na palang mawala sa Luna Blanca sina Jillian Ward at Mona Louise Rey dahil magti-taping na sina Barbie Forteza at Bea Binene sa July 4. Si Barbie ang gaganap na dalagitang Blaca at si Bea ang dalagitang Luna.

Para mas may kilig ang second generation ng Luna Blanca, bibigyan ng kapareha sina Barbie at Bea, kaya lang, hindi ang ka-love team nilang sina Joshua Dionisio at Jake Vargas. Sina Derrick Monasterio at Kristoffer Martin ang ipapareha kina Barbie at Bea bilang expirement na rin siguro.

Si Derrick ang makakapareha ni Barbie at si Kristoffer ang makaka-love team ni Bea.

Ang sabi lang sa amin, mahirap ang role ni Derrick at ang pamilya nila ang aampon kay Blanca (Barbie) at mayaman naman si Kristoffer.