Pagsulbong ni Jona

Name: Jonalyn Jumabes

Nickname: Jona or “Ate Jona”

Address: Cebu City, native of Moalboal, Cebu

Birthday: July 2, 1981

School: USJR

Course: Masscom 

Favorite celebrity: angelina jolie/ angel locsin

Celebrity crush: milton bradly / bong revilla & coco martin! hahaha

Song of the moment: love will always find a reason/ forever

Motto: Just Keep Believing & Your Dream Will Come True

Vital stats: hahahah di ko mo answer ani

Height: 5’

Disiete anyos pa lamang siya dihang nag-apil apil siya sa mga drama sa dyRC. Usa na ka tuig ang milabay, mi-boluntaryo siya isip reporter sa Aksyon Radyo, ubos sa pagdumala ni kaniadto station manager ug karon City PIO head, Carlo Dugaduga, samtang nagpadayon siya sa iyang kursong mass communication sa University of San Jose Recoletos. Hangtud nga gikuha siya isip regular reporter ug unom na ka tuig ang milabay nasulod pud siya sa CCTN Channel 47 isip field reporter. Karon, regular na siya nga makita matag hapon isip co-anchor sa banner newscast sa maong TV station nga mao ang “ Balita Karon” matag alas singko, kauban ang banggitan ug beteranong broadcaster nga si Manny Rabacal.

Paborito ni Jonalyn, ang mga balita nga puno sa aksyon, samtang si Korina Sanchez maoy iyang idolo sa natad sa panibya, ug may higayon pa gani nga gisunod niya ang tingog niini, apan iyang nasabtan sa ngadto ngadto nga ang matag magsisibya managlahi og istilo sa pagbalita, hinungdan nga gipa undayonan niya ang iyang kaugalingong tingog ug nagmugna siya og kaugalingong istilo.

Banat News Hugyaw (BNH): Unsay mga kalisdanan nga imong naagian usa ka miabot karon sa imong posisyon isip news anchor?

 Jonalyn: Lisod ang pagbahin sa panahun labi na kun duha ang network nga imung gitrabahuan, miagi og kalisdanan sama sa ubang field reporter nga mosum-ok sa bisan asa nga lugar ug mosungasong sa bisan unsang kakuyaw aron lang makahatag og maayong coverage o kompletong balita…usahay dili makakaon sa saktong panahun gumikan sa mga deadlines sa balita ug gidawat ang tanang kasaba sa mga labaw sa opisina sa higayon nga dunay mga kasaypanan ug kapalpakan nga mahimu.

BNH:  Unsay dili nimo malimtan nga coverage o istorya nga imong nahimo? Ngano man?

Jonalyn: Daghang coverage ang dili gyud malimtan sama sa mga dagkong sunog nga nahitabo sa Sugbo nga mopauli ka nga basa kay nasiritan sa tubig ug uban pa, apan ang dili nako malimtan nga coverage mao ang pagkalunod sa Princess of the Stars nga akoy nagsunod sa story ato gikan sa pag-abot sa mga patay’ng lawas ug mga remains nga hapit tibuok adlaw ka nga naa sa punerarya nga giantos ang baho nga hantud pa sa imong pagpauli imong madala ang baho sa lawas.

BNH: News anchor ka sa CCTN ug may program ka sa dyRC 648KHZ matag ala una sa hapon nga dili news og format, giunsa nimo pag-balance ang duruha?

Jonalyn: Isip news anchor sa CCTN-47 sa CCTN News matag alas singko sa hapon akong gipaningkamutan nga mapakita sa mga viewers nga seryoso ko nga pagkatawo ug masaligan sa matag balita nga among gitahod, kinahanglan wholesome ang image. Matag ala una sa udto dunay program sa dyrc “Mga Gapnod sa Kinabuhi,” medyo entertainment siya, motambag og mga problema, mohatag og mga tips about sa lovelife, etc.; dili pwede nga magseryuso og maayo sa maong program para dili laay nga paminawon, mogawas ang pagka komedyante pero gilikayan gyud kutob sa mahimu ang mga green jokes nga makaapekto pud sa akong pagka newscaster sa CCTN

BNH: Unsay imong panahom sa nagka grabe nga kumpetisyon sa local television newscast sa Sugbo?

Jonalyn: Grabe kaayo ang kompetisyon karon, apan sa akong kaugalingun dili ko makatumbas sa mga dagkong newscaster, apan bisan gamay wala ko maghunahuna nga makakompetensya o makalevel nila, ang importante nga akong gibuhat ang tanan aron mahatud nako ang akong responsibilidad ug matabangan usab ang kompaniya nga akong gitrabahuan nga dili sab maiwit sa paghatud sa mga kasayuran ngadto sa katawhan sama sa nahimo sa ubang network.

BNH: Describe your self. Unsay ganahan ug dili nimo ganahan sa usa ka tawo?

Jonalyn: Simple lang ko nga pagkatawo kun unsay makalipay nako akong buhaton basta dili lang kini makadaot kanako ug sa uban, dili kaayo ko maghunahuna og problema kay alang nako walay problema nga dili masulbad. Open ko sa akong life, ang dili nako ganahan sa usa ka tawo nga magpakaaron-ingnun o plastik sa akong atubangan. Gusto ko nga open siya nako kay bisan unsa pa siya andam ko nga modawat ug makighigala niya. Ang gusto nako sa usa ka tawo nga matinud-anun.

BNH: Unsa para nimo ang meaning sa success?

Jonalyn: Para nako ang kalampusan mao ang sumada sa tanan nimung gihaguan, ug gasa sa Ginoo sa imung pagkamatinud-anun.

BNH: Kung kaatubang nimo ang Ginoo unsay imong pangayuon niya? ngano man?

Jonalyn: Kun maatubang nako si Lord, una nakong pangayuon niya nga makauban nako og daghan pang katuigan ang akong grandmother nga maoy nag-atiman nako gikan sa seven months pa ko since member man ko sa broken family ug gibiyaan man ko sa akong mama. Ikaduha nga akong pangayuon niya nga makabaton unta ko og tibuok nga pamilya nga malipayon. Unya kun mosugot pa jud si Lord mangayo kog pakapin iya na untang ihatag nako ang swerte sa lovelife, hahaha, kay kun bahin sa work I think naa na nako ang tanang swerte sa trabaho.