Angel ang Sexiest?
CEBU, Philippines - Nahuman adtong Miyerkules ang botasyon alang sa “FHM 100 Sexiest Women in the World” apan wala pa ipahibawo kinsay number one karong tuiga.
Apan balita ni Mario Dumaual sa TV Patrol adtong Biyernes mao nga si Angel Locsin maoy nag-una sa listahan.
Sanglit gipaabot pa ang opisyal nga pamahayag sa tagdumala sa magazine, pangutana sa mga himantayon kun ang maong balita nagpasabot ba nga si Locsin maoy midaog sa survey karong tuiga.
Katapusang result nga giluwatan sa FHM adtong May 25, nagpakita nga si Sam Pinto maoy nag-una ug gisundan ni Angel ug Solenn Heussaff. Si Sam maoy midaog sa milabay nga tuig.
Jessica motikang sa Pilipinas karong September
Segurado na ang pagtikang dinhi sa Pilipinas sa American Idol runner-up Jessica Sanchez.
Nalakip ang Pilipinas alang sa American Idol Live Tour ug kini mahitabo karong September 21 sa Araneta Coliseum kung diin makauban ni Jessica ang uban pa nga finalists sa American Idol.
Una na nga gipadayag ni Jessica nga hagbay ra niya nga gipangandoy nga motikang sa nasud gumikan kay naa dinhi ang kasagaran niya nga kaliwat.
Taga Bataan ang inahan ni Jessica nga si Editha busa gipasigarbo niya pag-ayo ang iyang pagka-Pinay.
Samtang gikatakda nga mokanta karong adlawa si Jessica sa national anthem sa Amerika nga "Star-Spangled Banner" sa away nila ni eight division world champion Manny Pacquiao ug Timothy Bradley sa Las Vegas, Nevada.
Sandra napili nga Sexiest Vegetarian Celebrity 2012
Ang beauty queen nga si Sandra Seifert maoy nakalangkat sa titulo nga Sexiest Vegetarian Celebrity 2012 human sa pipila ka buwan nga piniliay pinaagi sa PETAAsiaPacific.com. Gikatigi ni Sandra sa nahisgutang titulo mao ang mga sikat nga personalidad sama nila ni Lougee Basabas, Alicia Mayer, Geneva Cruz, ug Yasmien Kurdi.
Dugang pa nga contenders naglangkob nila ni Chin-Chin Gutierrez, Raymond Bagatsing, Maricel Laxa-Pangilinan ,RJ Ledesma, ug ang mga international stars nga sila si Natalie Portman, Russell Brand, ug Leona Lewis.
Nalakip si Sandra sa bag-ohay lang nga propaganda material sa PETA nga nagtangag sa tagline nga “Save the Planet, Go Vegetarian.”
Derek gipalabi ang Amazing Race
Miatras si Derek Ramsay sa pag-host sa Miss World Philippines 2012 Coronation Night karong June 24 gumikan kadungan kini sa taping niya sa Amazing Race Philippines.
Vhong ug Vice nag-away?
Miulbo ang tsika nga matud pa nga nagkalalis sila si Vhong Navarro ug Vice Ganda sa dressing room sa It’s Showtime sa miaging adlaw ug hugot kini nga gihimakak sa duha ka kampo.
Misis ni Onemig pinangita
Nagkalambo ang career sa misis ni Onemig Bondoc nga si Valerie Bariou-Bondoc kinsa usa ka modelo ug matud pa nga nakadawat kini og mga offer alang sa pipila ka mga endorsements.
Modawat og mga bayot
Ang Artista Academy sa TV 5 giingong bukas alang sa LGBT lesbian, gay, bisexual, and transgender) community basta lang nga flexible lang kini sa bisan unsa nga role ,sama sa mga mahuyang nga artista sa laing nasud nga mahimong modala isip leading man.
Ogie sa MMP
Si Ogie Alcasid ang kasamtangang guest host sa Manny Many Prizes samtang naa pa sa Amerika si Kongresista Manny Pacquiao.
Nina todo na ang pagpa-sexy
Gibutyag ni Nina nga seguradong mahugyaw gyud ang iyang fans sa iyang sexy dance album sa Universal Records ug gikatahong deretsohay na ang pagpa-sexy sa singer human usab siya nahimong cover girl sa Playboy Magazine.
Pauleen ug Vic buwag na
Gikataho nga wala magdugay si Pauleen Luna sa presscon sa My Daddy Dearest gumikan kay hadlok kini nga pangutan-on kalabot sa break-up nila ni Vic Sotto.
Gastohan og maayo
Matud pa nga dunay giluto karon nga bag-ong serye ang TV 5 nga langkoban sa mga beterano ug beterana nga artista ug gikatahong gastohan kini pag-ayo sa maong network.
- Latest
