Inisyung tseke ng aktres na sikat na nasa abroad, tumalbog

Tumalbog ang tseke ng isang aktres dahil sa kawalan ng pondo. Confirmed na parang basketball na tumalbog ang tseke ng aktres dahil na-witness ko ang mga pangyayari.

Nagpunta sa ibang bansa ang aktres kaya hindi ako sure kung nakarating sa kanya ang balita.  Kung ibabase sa kasikatan ng aktres ang halaga na nakasulat sa tseke, may kaliitan ito kaya nakapagtataka na pinatalbog pa niya.

Kawawa ang tao na binayaran ng aktres dahil hindi siya nakakatiyak kung mapapalitan pa ang tumalbog na tseke.

Sheena umaming sarap na sarap sa mangga pero hindi buntis

Guest namin kahapon si Sheena Halili sa Startalk dahil idinenay niya ang balita na buntis siya. Itinanggi rin ni Sheena ang balita na may relasyon  sila ni Rocco Nacino pero umamin siya na lumalabas o nagde-date sila.

Ipinaabot ni Sheena sa kanyang mga magulang na wala silang dapat ipag-alala dahil good girl siya. Hindi raw niya sisirain ang tiwala ng kanyang ama at ina.

May duda si Sheena na natsismis na buntis siya dahil may nakakita sa kanila ni Marian Rivera na sarap na sarap habang kumakain ng manggang hilaw sa taping ng Tweets for My Sweet.

 Naisip din ni Sheena na biktima siya ng mistaken identity dahil pareho sila ng apelyido ni Katrina Halili. Buntis na buntis si Katrina at hanggang ngayon, napagkakamalan ng fans na iisang tao sina Sheena at Katrina.

Richard excited na sa Makapiling

Excited si Richard Gutierrez sa pagsisimula ng Makapiling Kang Muli kaya sa promo guesting kahapon sa Eat Bulaga, nasabi niya na ngayong gabi ang pilot telecast ng kanyang primetime show sa GMA 7.

Binawi ni Richard ang kanyang sinabi nang umapir siya kahapon sa Startalk. Itinuwid niya na bukas at hindi ngayong gabi ang umpisa ng Makapiling Kang Muli na inaabangan ng fans dahil na-miss nila  na umaarte sa TV ang kanilang favorite actor.

Maganda ang role ni Richard sa bagong primetime show ng Kapuso network at nakipagtagisan siya ng pag-arte kina Phillip Salvador, Robert Arevalo, Rio Locsin at Gloria Romero.

Direk Mark nangarag

Si Mark Reyes ang direktor ng Alice Bungis­ngis at siya rin ang direktor ng Kasalanan Bang Ibigin Ka?

Naging hectic ang schedule ni Mark dahil na-extend ng ilang linggo ang Alice Bungisngis kaya nagpang-abot ang taping nito at ng Kasalanan Bang Ibigin Ka?

Bukas ang umpisa ng huling linggo sa TV ng Alice Bungisngis at bukas din ang unang linggo sa ere ng Kasalanan Bang Ibigin Ka. Babalik na uli sa normal ang schedule ni Mark dahil sa nalalapit na pagtatapos ng Alice Bungisngis.