Garrie at K-la, pinabilib ang 800 na buntis

MANILA, Philippines - Napaindak at napasabay sa kantahan nina Garrie Concepcion at Star Power inalist na si K-La ang mga buntis na dumalo sa ikasampung Buntis Congress ng DZMM Radyo Patrol 630 at DZMM TeleRadyo kamakailan sa SM Megamall MegaTrade Hall 1. Inawitan nina Garrie at K-La ang higit sa 800 buntis ng sikat na pop songs at orihinal na mga kanta mula sa kani-kanilang album. Bukod sa kanila, naroon din ang mga DZMM anchor na sina Winnie Cor­dero, Onse at Ahwel Paz upang aliwin ang mga lumahok sa event. Taun-taong nagdaraos ng Buntis Congress ang DZMM para mabigyan ng sapat na kaalaman ang mga nagdadalang tao ukol sa mga dapat at hindi dapat gawin habang nagbubuntis at sa pagpapalaki ng anak.