Anak ni Clint Eastwood bumili ng mamahaling bag bago sinunog

MANILA, Philippines - Isang mamahaling bag ang binili ng isang anak na babae ng aktor na si Clint Eastwood para lang sunugin habang kinukunan ng litrato.

Ayon sa ulat ng TMZ, “kasabwat” ng 19 anyos na si Francesca Eastwood ang nobyo niyang celebrity photographer na si Tyler Shields sa isinagawa nilang “krimen.”

Bida sa E! show na Mrs. Eastwood and Company ang reality TV star na anak ng beteranong actor-director.

Sinasabi pa sa ulat ng TMZ na nakatuwaan nina Francesca at Tyler na magbitiw ng malaking halaga ng pera at bilhin ang isang Hermes na handbag para masira lang nila ito.

Halagang $100,000 ang nasabing bag pero mukhang merong napakaraming pera ang anak ni Clint kaya hindi nanghinayang na sunugin ang bag. Nilagare pa nila ang bag habang nagliliyab ito.

Bakit nila ginawa iyon? Para lang makunan ng litrato (nasa itaas) ang bag habang ito ay nilalamon ng apoy.