Bianca King ipinagluto ng lahat ng seafood si Dennis

July pa papasok ang karakter ni Bianca King sa Luna Blanca kaya kahit airing na nito sa Mon­day, hindi pa rin mag-aabot sa Bro­ken Vow  na sa June pa magtatapos. Sobrang saya ang aktres sa paniba­gong soap niya, nagbunga raw ang seven years na kanyang paghihintay, kaya overwhelmed siya.

Napanood pa lang daw niya ang teaser ng Luna Blanca, kinabahan na siya lalo na nang malamang siya si Luna. Excited na siyang laruin ang karakter nito at balak niyang dumalaw sa taping para pag-aralan ang nuances ni Jillian Ward. Ready na si Bianca sa body paint na gagamitin sa kanya.

Pinuna namin ang pagka-tan ni Bianca matapos ang bakasyon sa Boracay kasama si Dennis Trillo para sa birthday nito, kung saan, ipinagluto niya ang BF ng lahat ng klase ng seafood.

Nahihilig sa pagbi-bake ng cake si Bianca at pea­nut butter cupcake at carrot cake raw ang favo­rite ni Dennis at ipinagmalaki nitong organic ang ingredients na gamit niya. Nagsimula na rin siya ng kanyang food blog.

Bagong show ni Nora Aunor sa TV5 hindi na pinag-uusapan, Magtatagal din muna sa Amerika

Birthday ni Nora Aunor bukas at ang balita namin, lilipad ito tungong US para doon mag-celebrate ng kaarawan. Kahapon, may taped birthday segment siya sa Paparazzi ng TV5.

Hindi muna babalik ng bansa si Guy dahil kasama siya sa Kapatid stars sa shows ng Kapatid Global at pagkatapos nito, pupunta na siya sa Boston para ipagamot ang throat at sa New York naman ang therapy. Gustung-gusto na ni Guy na bumalik ang kanyang boses dahil gustong tuparin ang pa­ngako sa Noranians na magko-concert siya rito bago matapos ang 2012.

Bago umalis, tinapos ni Guy ang shooting ng pe­likulang Thy Womb sa direction ni Brillante Mendo­za na sabi, ipapasok sa Venice International Film Festival. Bigla naman nahinto ang usap-usapan sa ga­­gawin niyang show sa TV5, kaya wait na lang tayo!

Alden Richards hindi makatulog

Hindi pa namin nakikita si Alden Richards mula nang makabalik from Los Angeles, hindi namin ma­kita ang sinasabi ni Lhar Santiago na maitim ang eye bags ng young actor dahil hindi makatulog dahil sa jet lag.

Kahit hindi nakakatulog, siguradong masaya si Alden sa kakaibang experience niya sa red carpet premiere ng The Road  at sa mga lugar na napunta­han noong nasa Amerika siya. Kasama rito ang pa­nonood nila ng Ellen ni Ellen DeGeneres.

Samantala, ipinapakita na ang teaser ng next soap ni Alden after My Beloved. Ito’y ang One True Love kapareha si Louise delos Reyes. Si Jean Gar­cia ang gaganap na ina ni Alden at sina Agot Isi­dro at Raymond Bagatsing naman ang mga ma­­gulang ni Louise. Si Andoy Ranay ang director nito.

Gina Alajar tuloy na bilang kapatid

Maitanong nga sa TV5 kung totoo ang tsikang ang TV remake ng Inang Yaya ng Unitel ang first directorial job ni Gina Alajar sa network. Matanong na rin kung si Maricel Soriano pa rin ang bida sa TV remake ng pelikulang kanyang pinagbidahan. Ibig sabihin, tuloy na ang paglipat ni Gina sa TV5 dahil may nabanggit ng project.

Nang ma-interview namin siya sa taping ng Hiram Na Puso, hindi pa makapag-comment, pero ina­ming may offer sa kanya at hindi lang para mag-direk. Kasama rin siya sa Talent Development Department na pinamumunuan ni direk Mac Alejandre.