Ang gipangita sa X-Factor

CEBU, Philippines - Andam na ang X-Factor Philippines nga mukaplag sa bag-ong singing sensation sa Pilipinas. Duyog sa upat ka mga dagkong personalidad sa musika nga sila si Concert King Martin Nievera, Mr. Pure Energy Gary Valenciano, international singing sensation Charice, ug Asia’s Queen of Songs Pilita Corales nga maoy mahimong mga hurado ug magtutudlo sa mga mapiling contestant.

Sa presscon dinhi sa Sugbo adtong Martes sa hapon diha sa Plantation Bay Hotel, miingon si Pilita Corales, nga tanan nga tawo maka-kanta man, apan dili tanan maka-kanta nga gikan sa ilahang kasing-kasing ug mao kana ang gipangita sa X-factor. Dugang pa niya, dili lang tingog ang ilahang gipangita, kun dili ang personalidad nga mabaligya worldwide. “I am looking for someone that when he does, he will give it all,” suma pa sa Asia’s Queen of Songs.

Isip usa sa mga judge-mentor, si Gary Valenciano mipadayag sa iyang kahinam sa kompetisyon. Matod pa niya, mas malipay siya nga ang iyang gitudluan, maoy mudaog. Apan gipasalig niya nga iyang giyahan ang matag-contestant aron mapalambo nila ang ilang talento.

“I want someone that can sing with passion, the one that can stand on stage, and the one that will express himself in his own particular way, that even the 5th judge which is the audience can capture. It is not about your face, it’s all about your heart,” tubag ni Gary sa pangutana kung unsa man ang iyahang kwalipikasyon para sa sunod nga superstar.

Si Martin Nievera, sa laing bahin miingon nga kung dili pa siya usa sa mga hurado, plano gyud niya nga mu-apil og X-factor sa gawas sa nasod. Matod pa niya, gipangita niya ang usa ka contestant nga mulungtad sa music industry, nga maka-kanta kuyog sa mga bangiitan nga mga mang-aawit. “I am looking for someone that sings like it’s the last day on Earth,” matod pa sa Concert King

Samtang si Charice isip labing bata nga hurado mapasalamaton nga apil siya sa mga judge-mentor. Matod pa niya, naagian na niya kung unsa man ang bati-on sa mga contestant gumikan kay naka-apil naman siya og mga contest sa una.

Ang mga celebrity judge-mentor mu-adto sa lain laing parte sa nasod kuyog ang host nga si KC Concepcion aron pangitaon ang mamahimong mu-angkon sa P4 million nga ganti sa maong contest.

Matod pa ni KC, dili lang ang mga contestant maoy mag-tigi, apil na sad ang mga hurado kay sila man ang mu-bansay sa mga kontestant.

Atangi ang labing dako nga singing competition karong tuiga, ang X-Factor Philippines nga isalida na sa ABS-CBN karong Hunyo 23.

Makita dinhi ang mga pambato gikan sa Visayas nga maoy nakalusot sa duha ka adlaw nga auditions diha sa Hoopsdome sa Lapu-Lapu City adtong Miyerkules ug Huwebes.