Maja bag-ong partner ni Enchong

CEBU, Philippines - Sa unang higayon magpares sa usa ka project sila si Enchong Dee ug Maja Salvador pinaagi sa serye nga “Ina, Anak, Kapatid” kung diin nalakip usab niini sila si Rayver Cruz, Xian Lim ug Kim Chiu.

Aminado si Enchong nga mabag-ohan siya sanglit naanad siya nga Erich Gonzales ang iyang kapares. Nasayran nga nagkauban sila ni Erich sa upat ka teleserye ug duha ka pelikula.

Malipayon usab si Enchong sanglit taudtaud na usab niya nga gipangandoy nga makauban si Maja sa usa ka proyekto.

“First time kong gagawa ng teleserye na hindi si Erich ‘yung makakasama ko, and si Maja ‘yung makakasama. And I’m so happy dahil matagal ko nang hino-hope na si Maja naman maka-pareha ko. To begin with, barkada na talaga kami without having any shows together,” suma pa ni Enchong atol sa story conference sa maong show sa miaging adlaw.

Kahinumduman nga miangkon kaniadto si Enchong nga na-crush siya kang Maja busa dako ang iyang pasalamat sa Dios gumikan kay nabatyagan ang ilang chemistry.

Hugyaw nga birthday party ni Mommy D

Rainbow colors ang konsepto sa hugyaw nga birthday party ni Mommy Dionesia Pacquiao karong Mayo 15 sa gym sa General Santos City.Suma pa niya nga han-ay na ang programa ug linibo ka mga bisita ang modagsa niini ug suma pa niya nga wala siya mangimbitar og mga artista.

Samtang gibutyag ni Mommy D sugdan na usab sa dili madugay ang gipatukod niya nga balay nga bungalow sa usa ka subdivision sa GenSan .

Una na nga gipahibalo ni Mommy D nga gibaligya na niya ang mansiyon nga hinatag sa iyang anak nga si Manny sa Barangay Labangal gumikan sa kadako niini.

Kim kanunay surpresahon ni Xian

Gipadayag ni Kim Chiu nga palahi nga pamaagi ang gipangbuhat karon ni Xian Lim isip istilo sa pagpangulitawo niini ngadto kaniya.

Suma pa sa aktres nga mahiligon si Xian sa pag-umol og surpresa ug gihulagway niya kini nga sweet nga pagkatawo.

Adunay higayon nga gihatagan ni Xian si Kim og isda gikan sa Amerika butang nga nakapahugyaw kaniya.

Natandog usab og maayo si Kim sa dihang pagbalik niya sa balay gikan sa shooting sa pelikulang Healing, misugat kaniya ang daghang buwak sa sala nga dunay porma nga heart.

Nasayran na lang ni Kim nga si Xian maoy nagmugna niini ug gisabot niini ang iyang mga igsuon.

Pabilin nga tak-om si Kim hangtud karon sa tinud-anay nga istado nila ni Xian.

Daniel apektado gihapon

Gikatahong miniwang si Daniel Matsunaga ug gituohan nga nasakitan gihapon kini sa break-up nila ni Heart Evangelista. Ang duha padayon gihapon nga magtagad sa set sa Party Pilipinas apan nagdumili sa pagtug-an sa rason sa ilang panagbuwag.

Binay nangumpanya ni Jessica

Nangumpanya pag-ayo si Bise Presidente Jejomar Binay sa iyang mga higala sa Amerika nga suportahan   ang Filipina-Mexican-American nga si Jessica Sanchez sa American idol. Matud pa niya nga dakong garbo sa atong nasud ang pagkasulod ni Jessica sa Top 3 sa AI.

Nagbalik o wala?

Gikatahong si Hayden Kho maoy nagpakatap sa istorya nga matud pa nagbalik na sila ni Dr. Vicki Belo. Apan ang kampo sa doktora dali nga mihimakak sa maong taho.

Pamaagi sa Sta. Cruzan

Suportado sa Miss Earth-Philippines organization ang pahimangno sa Catholic Bishops Conference of the Philippines (CBCP) nga mga babaye ra gyud ang mosalmot sa mga Sta.Cruzan. Nasayran nga dunay ubang dapit ang nagpasalmot og mga mahuyang sa Sta.Cruzan.

Diana mo-focus sa pagtungha

Gitanyagan og balik si Diana Zubiri sa usa ka network nga mobalik sa showbiz apan nibalibad kini gumikan kay ganahan siya mo-focus sa iyang pagtungha sa kursong Theater Arts. Tsika pa sa aktres nga mobalik ra siya sa showbiz sa saktong panahon.

Derek sa Boy Pick-Up

Nalakip sa gamay nga eksena si Derek Ramsay sa pelikula ni Ogie Alcasid nga si Boy Pick-Up. Samtang wala usab madayon si Sen. Miriam Santiago sa pag-guest sa maong pelikula gumikan sa ka-busy sa trabaho niini.

Sud-an ni Eric halinon

Wala magpasaka og presyo si Eric Quizon sa mga sud-an nga iyang gipamaligya sa gamay niya nga kan-anan duol sa Camp Aguinaldo hinungdan nga dagsaan kini kanunay sa mga tawo. Suma pa ni Eric nga gawas sa showbiz, busy usab siya sa maong negosyo.

Isang Dakot extended

Matud pa nga extended og tulo ka semana ang Isang Dakot na Luha sa TV 5 gumikan sa mga positibong feedback nga nadawat niini. Ang maong serye gibituonan nila ni Alice Dixson, Glydel Mercado, Jay Manalo, Daria Ramirez, Danita Paner ug Edgar Allan Guzman.