Slater Young gilinyahan og projects

CEBU, Philippines - Andam na mobirada ang Pinoy Big Brother (PBB) Unlimited  big winner Slater Young sa umaabot niya nga mga proyekto sa ABS-CBN.

Nahinabi si Slater kagahapon sa mga sakop sa Cebu Entertainment Press atol sa press conference nga gipahigayon sa Yakiniku Restaurant diha sa Crossroads, Banilad niining Dakbayan sa Sugbo.

Matud pa ni Slater nga malakip siya sa umaabot nga episode sa Maalaala Mo Kaya (MMK) kung diin iyang ikauban si Ian de Leon, Dimples Romana ug uban pa.

Nagkanayon ang Sugbuanong engineer nga dako kaayo kini og ikatabang kaniya ilabi na nga napuno kini sa drama.

Gikatakda nga sugdan karong adlawa ang taping sa maong episode sa MMK diin modala siya isip bestfriend sa usa mga bida niini.

Puwerti usab nga lingawa ni Slater sa pag-guest niya kagabii sa Gandang Gabi Vice ug gikatakdang magbaha pa ang mga guestings niya sa nagkadaiyang programa sa ABS-CBN.

Nasayran nga nasuwayan na ni Slater ang pag-guest sa The Buzz, Umagang Kay Ganda, Kris TV, , Bandila, Ako Ang Simula, Banana Split, Rated K, Cinema News, Mornings @ ANC ug E-Boy.

“Dili gyud ko kalimot anang E-Boy, kay gatoo ko nga usa ra ka linya ang akong isulti. Apan 10 minutes sa wala pa magsugod ang taping, gitagaan ko og usa ka page nga script, hehehe.Lingaw ra pud kaayo ang taping,” matud pa ni Slater.

Matud pa nga duna pa gitagana nga proyekto kaniya ang ABS-CBN apan maglisod pa siya sa pagbutyag niini sanglit nagpadayon pa ang sabot-sabot niini.

Hapit na usab makita si Slater sa noontime show sa ABS-CBN nga It’s Showtime kung usa siya sa mahimong guest hurado.