Ex-deal

CEBU, Philippines - May ex-deal nga mahitabo tali sa ABS-CBN ug GMA-7. Si Jennylyn Mercado, mu-guest sa April 21 episode sa Deal Or No Deal diin host niini ang iyang uyab nga si Luis Manzano. Isip bugti, mulugwa pud si Luis sa birthday celebration ni Jen sa Showbiz Central sa May 13.

Walay label lagi

Hangtud karon nagdumili gihapon si Phil Younghusband pagbutang og label sa ilang relasyon ni Angel Locsin. Niya pa, "Why change what is not broken?", ilabi na nga nagkalig-on ang ilang relasyon. "The love is getting stronger every day," ni Phil pa, kinsa mu-guest karong gabii sa sitcom ni Angel sa ABS-CBN, To Da Max.

Xyriel sa Wansapanataym

Human ni Toni Gonzaga, ang Kapamilya child wonder nga si Xyriel Manabat na pud maoy pambato sa espesyal nga presentasyon sa Wansapanataym sa ABS-CBN karong gabii. Sa episode nga “Maan Tukin” si Xyriel mudala sa papel sa usa ka bata nga labihan ka tapulan hinungdan nga gisilotan sa usa ka engkanto nga nahimamat niya sa iyang damgo, diin makatulog na lamang siya bisan asa.

Kaanyag ug talento

Hiusahon pinaagi sa entablado sa Party Pilipinas ugma sa udto ang tanang top-rating teleseries sa primetime ug afternoon block sa GMA-7 lakip na ang mga bida niini. Kini alang sa usa ka hugyaw nga performances nga mupakita og kaanyag ug talento.

Tropang Pochi

Sa Corregidor didto sa Bataan maglaaglaag karong adlawa ang mga bata sa Tropang Potchi sa GMA-7. Kini alang sa usa ka educational tour ug bakasyon. Makita ang nahisgutang kiddie show alas nuwebe karong buntag.

Miss World sa TV5 Na!

Ang TV5 na maoy media partner sa Miss World Philippines sugod karong tuiga. Gipasalig sa Kapatid Network nga mas hugyaw pa nga pagpahigayon sa labing dako nga indigay sa kaanyag sa tibuok kalibutan ang masaksihan, ilabi na nga mitapos isip First Princess ang pambato sa Pilipinas nga si Gwendoline Ruais sa milabay nga tuig didto sa London, England.

Nangunay og buhis

Wala ilimod ni Michael V nga usa siya sa mga highest taxpayers sa nasud sanglit siya mismo ang nangunay og asikaso sa iyang buwis sa pag-abag pud sa iyang asawa, ug tanan matud pa ilang gideklara ngadto sa BIR. "Ang nag-handle ng finances ko, 'yung asawa ko. Ako nga, nagulat din nung sinabi 'nya sa akin, at hindi ko nga alam kung matutuwa ako maiiyak," nagkatawa pa si Bitoy. Samtang excited si Michael sa umaabot nilang programa ni Ogie Alcasid sa GMA-7 nga magsugod sunod bulan, ang Pare and Pare.