TV 5 gibalibaran ni John Lloyd

CEBU, Philippines - Si John Lloyd Cruz diay unta ang unang gitanyagan sa TV 5 nga pabalhinon sa ilang istasyon sa wala pa nila tanyagi si Derek Ramsay nga maoy mo-host sa The Amazing Race Philippines.

Apan wala mosugot si Lloydie gumikan kay naikog siya sa iyang mother network , ang ABS-CBN.

Suma pa sa aktor nga nagbaha ang iyang mga serye ug pelikula sa Dos busa wala siya’y rason nga mobiya niini.

Kasamtangang gigama karon sa aktor ang pelikula sa Star Cinema kung diin makauban niya ang ubang artista sa Star Magic sama nila ni Kim Chiu, Piolo Pascual, Jake Cuenca, Pokwang, Diether Ocampo ug Angelica Panganiban.

Naghinam-hinam na pud siya sa subling panag-uban nila ni Sarah Geronimo sa usa ka pelikula kung diin si Cathy Garcia-Molina gihapon ang direktor niini .

Aduna pu’y gikatakdang buhaton nga serye si John Lloyd sa Dos ug iyang makauban ang kanhi niya leading lady nga si bea Alonzo.

Gikatakda sila nga manglarga ni Bea sa Austria sunod buwan aron buhaton ang pipila ka mga eksena sa nahisgutang pelikula.

Katapusang nag-uban sila si John Lloyd ug Bea sa pelikulang “Miss You Like Crazy” niadtong 2010 ug sa seryeng I Love Betty La Fea niadtong 2008.

Inahan ni Cheesa nagtubo sa Cebu

Mga positibong komento gikan sa mga hurado ang nadawat sa Filipino-American nga si Cheesa Laureta sa usa sa mga sikat nga reality singing competition sa Amerika nga The Voice.

Sa Hawaii gipanganak si Cheesa apan ang amahan niini taga- Maynila samtang ang iyang inahan nagtubo sa Cebu.

Gipahigayon niadtong Lunes sa gabii ang unang performance ni Cheesa kung diin gikanta niya ang awit nga gipasikat ni Thelma Houston nga “Don’t Leave Me This Way.”

“I actually loved that.. I was like watching ‘Solid Gold.’ It was the perfect song for you,” suma pa sa hurado nga si Blake Shelton.

Gidayeg usab sa hurado nga si Adam Levine (bokalista sa Maroon 5) ang performance ni Cheesa gumikan sa kanindot sa rendisyon niini.

Ang 21 anyos nga si Cheesa mipuyo sa Los Angeles sa nag-edad pa lang siya niadto og 15 anyos gumikan kay taud-taud na gyud niya nga pangandoy nga makasulod sa Hollywood.

Ang programang The Voice maoyhingpit nga katigi sa American Idol . Kung si Cheesa maoy garbo sa Pilipinas sa The Voice, laing Fil-Am usab nga si Jessica Sanchez maoy naghatag og dungog sa nasud pinaagi sa programang American Idol.

Nora motikang sa Tawi-Tawi

Motikang na si Nora Aunor karong Sabado, Abril 14 paingon sa Tawi-Tawi alang sa shooting sa The Womb, ang indie film nga gamaon ni Brillante Mendoza. Nalakip sa casts sila si Lovi Poe, Mercedes Cabral, ug Bembol Roco. Moabot sa 15 ka adlaw ang pag-istar nila sa maong dapit.

24 Oras nominado sa Monte Carlo

Nagmaya pag-ayo ang tibuok staff sa 24 Oras sa GMA-7 gumikan kay nominado ang nahisgutang programa sa 52nd Monte Carlo TV Festival alang sa kategoryang Best 24-Hour News Program.

Louise: Wala ko ga-diet!

Giangkon ni Louise delos Reyes nga dali ra gyud siya malipong hinungdan nga kanunay siya nga makuyapan sa set sa iyang mga programa sa GMA-7. Matud pa sa aktres nga dili tinuod ang mga balita nga matud pa nadaot ang iyang lawas gumikan sa pagsige niya og diet.

Thelma mobirada sa laing nasud

Naghinam-hinam na si Maja Salvador sa pag-abot sa buwan sa Hunyo gumikan kay nominado ang pelikula niya nga Thelma sa Madrid Internatio­nal Film Festival didto sa Spain alang sa Best Feature Film ug Best Cinematography. Samtang mosalmot usab ang Thelma sa 3rd New York City International Film Festival sa New York karong Agosto.

Angelica komportable ni Piolo

Tsika pa ni Angelica Panganiban nga wala na siya mag-adjust sa team-up nila ni Piolo Pascual sa pelikulang “Every Breath U Take,” gumikan kay kadaghan na sila nag-uban sa aktor sa usa ka proyekto. Matud pa sa aktres nga komportable siya kang Piolo busa dako ang iyang pagsalig nga hangpon sa publiko ang ilang tandem.

Jose ug Wally pasidunggan

Giingong dunay usa ka foundation ang buot mohatag og pasidungog kang Jose Manalo ug Wally Bayola gumikan sa kaayohan nga ilang nahatag sa katawhan. Matud pa nga kanunay nga mo-share sa ilang mga grasya sila si Jose ug Wally.

Kasal dili prayoridad ni Angel

Giklaro ni Angel Locsin nga bisan nagkalig-on ang relasyon nila ni Phil Younghusband, wala pa gyud masulod sa ilang huna-huna nga magpakasal.  Matud pa sa aktres nga wala’y angay dalian sanglit gi-enjoy pa man nila ni Phil ang ilang sitwasyon isip manag-uyab.

Slater midepensa sa akusasyon sa iyang mga kritiko

Gidepensahan ni “Pinoy Big Brother Unlimited” winner Slater Young ang iyang kaugalingon kalabot sa opinyon sa iyang mga kritiko nga matud pa nga maong nakadaug siya sa maong reality show gumikan sa iyang ka-guwapo ug “playing safe” ang dating niini sulod sa balay ni Kuya.

Suma pa ni Slater nga nakakita ang iyang followers sa maayong kalidad sa iyang batasan ug dili ang kaguwapo maoy hinungdan niini.

Gidepensahan usab niya ang tsika nga matud pa kanunay siya nga “playing safe” ug giklaro niya nga dili siya gusto og away busa dunay mga higayon nga mogawas ang iyang pagkahilomon.

Bisan usa na ka engineer si Slater, nanghinaut gihapon siya nga makasulod sa showbiz ug makabaton og maayong mga proyekto.

Matud pa niya nga ang pagsalmot niya sa PBB nakatabang sa iyang taud-taud na nga pangandoy nga makasulod sa showbiz world.

Krizza ug Aiza nagpa-cute sa usa’g-usa sa Twitter

Pabilin nga tak-om sila si Aiza Seguerra ug Chen Sarte sa rason sa ilang break-up apan kalit nga mitumaw ang tsika nga ang Protégé winner nga si Krizza Neri maoy rason niini.

Misamot ang mga pagduda nga dunay  relasyon sila si Aiza ug Krizza gumikan sa tagsa-tagsa nila ka mga tweets sa miaging mga adlaw.

Matud pa nga nag-post si Aiza og mensahe sa Twitter alang kang Krizza niadtong Abril 8 nga nagkanayon”I love you @krizzaneri :)”

Gitubag usab kini ni Krizza og: “I love you too, @aizaseguerra! :)”

Ang duha nagkaila sa dihang gipili ni Aiza si Krizza uban nila ni Mark Gregory King ug Zibrille Pepito, isip iyang alaga sa talent search show sa GMA-7 nga Protégé: The Battle for the Big Break .

Dinhi nagkasuod ang duha ilabi na nga giatiman gyud ni Aiza si Krizza samtang nagdagan ang show hangtud nga daghan gyud kini nga nakat-onan.

Bisan nahuman na ang kumpetisyon, nagpadayon gihapon ang ka-close nila ni Krizza ug Aiza.

Samtang sa usa ka interview, gihimakak ni Krizza ang taho nga matud pa duna sila’y relasyon ni Aiza nga maoy iyang mentor.