A true Darling

CEBU, Philippines - For me, the best formula to succeed is the combination of your determination and faith in the Above Being.

"Ang kalampusan dili masukod sa gidaghanun sa medalya nga imong nakab-ot, apan matugkad sa gidaghanun sa higayon nga ikaw mubarog sa mga panahon nga ikaw nahisukamud." Suma pa sa paboritong linya ni Darling Chyrmyth Wagas, 22-anyos, lumad nga taga- Liloan, Cebu, magtutudlo, beauty-titlist ug law student.

"Darchy", ang kasagarang tawag sa iyang mga higala kaniya. Graduate sa kursong AB Journalism sa University of the Visayas ug kasamtangang anaa karon sa iyang ikatulong hugna sa abogasya. Siya usa ka ehemplo sa babayeng Sugbuanon nga angay gayud nga ipasigarbo ilabi na gayud sa iyang ginikanan.

Nagsugod siya pag-apil og mga beauty pageants sa dihang 14-anyos pa lamang siya. Sa dihang nanginahanglan ang ilang tunghaan og representative para sa Cebu Provincial Competition sa Ms. UN, siya ang nahuna-hunaan sa iyang mga maestro nga isangka. Siya napilian gumikan sa iyang kaanyag nga tuod, simple lamang pero Cebuana beauty gayud. Ug dili lamang siya maanyag , maayo usab siya sa klase. Sa unang higayon aduna gayud pagduha-duha kung muapil ba siya o dili pero nipatigbabaw ang way puas nga pagsuporta sa iyang inahan nga maoy naghatag kaniya sa igong salig sa iyang kaugalingon nga kaya ra gayud niya ang maong indigay.

Ug bisan first time ang iyang pag-apil sa maong indigay apan nagmadaugon siya tungod kay siya ang nakakuha sa titulong "Ms. United Nations-Peace 2003, Cebu Province". Uban sa iyang kadaugan mao ang sunod-sunod nga paglangkat ug pagharos niya sa mga titulong "Ms. CAS (College of Arts and Sciences) tuig 2005 sa UV", "Ms. Liloan-3rd runner-up tuig 2007", "Ms. Rosquillos Festival-3rd runner-up tuig 2009", ug ang bag-uhay lamang nga gisaulog nga Press Freedom Week diin siya ang nahimong "Ms. Press Freedom-1st runner-up tuig 2011." Kini nagpaila lamang nga dili kabintahaan nga babayeng Cebuana si Darchy.

"I anticipated questions. Magstorya ko ako ra usa.haha," tubag ni Darchy sa dihang gipangutana siya kung unsa ang iyang sekreto sa di pa ang beauty pageant.

"Nagpabilin lang ko nga determinado nga mulambo ug kanunay nga nag-ampo. Para man gud nako, there's always a solution to every problem. Mura ra gud na'g math problem nga ihatag sa atong professors nato matag exam, all you need is the formula. For me, the best formula to succeed is the combination of your determination and faith in the Above Being.

Si Darchy adunay ambisyon nga mamahimong tipik sa media. Kini gumikan sa iyang tinguha nga makapa-ambit sa iyang talento pinaagi sa pagpamahayag. "Matag tan-aw nako sa mga idolo nako nga personalidad sa telebisyon kaniadto, o di ba kaha mabasahan nako ang ilang mga sinuwat, makaingon ko, "kanus-a kaha ko mapareha nila." I always keep that dream with me every time I wake up. Hehe," dugang pa niya.

Gumikan sa iyahang tinguha usab nga pagtabang sa ilang negosyo pinaagi sa pag-ila sa mga nagka-lain-lain nga mga balaod, ang iyang ka-uhaw sa pagkahibaw sa matag lusok niini, ug ang iyang pangandoy nga makatabang sa mga nanginahanglan ang nakapaagni kaniya nga mokuha og abogasya human siya ni-gradwar sa kursong Journalism.

Makabilib ug makaaghat gayud sa mga tinun-an si Darchy tungod kay samtang nagkuha siya karon sa iyahang abogasya, nagsilbi usab siyang magtutudlo sa Mass Communication sa UV.

"Migama ko og time table sa akong mga buluhaton sa matag adlaw. Sa susama nga paagi, di ko maglisud o di ba kaha maglibog sa pag-adjust sa akong oras", suma pa ni Darchy sa dihang gipangutana siya kung giunsa niya pagbalanse ang iyang oras.

Isip usa ka estudyante, very enthusiastic si Darchy. Matag mata niya sa buntag, mangutana gyud siya sa iyang kaugalingon kung unsa na pud kaha ang iyang mga makat-unan sa maong adlaw. Importante kaayo para kaniya nga duna'y makat-unan matag gawas niya sa tunghaan.

Kung unsa siya ka-enthusiastic isip usa ka estudyante, ingon usab isip magtutudlo. "I want my students to learn the culture of excellence. Ug aron makab-ot ni, kinahanglan mahalon usa nila ang konsepto sa pagkat-on sa tunghaan labaw sa tanan", batbat pa ni Darchy, kabahin sa iyahang prinsipyo isip magtutudlo.

Ang tanan niyang kalampusan, iya kining gidalit tanan sa iyang inahan nga way puas sa pagsuporta kaniya sa tanang desisyon nga iyang pagabuhaton.