Angelo Castro, Jr. 'babalik' sa ABS-CBN

Dadalhin ngayon sa ABS-CBN compound ang mga labi ni Angelo Castro, Jr. para sa necrological services na inihanda ng mga kasamahan niya sa news department.

Twenty six years na naglingkod si Angelo sa Kapamilya Network at nagsimula ito noong 1986, pagkatapos ng EDSA Revolution.

Tiyak na maraming kuwento tungkol kay Angelo ang kanyang co-workers, pati na sina former Vice President Noli de Castro, Korina Sanchez, Tina Monzon-Palma, at Sen. Loren Legarda.

Part 2 ng away nina Annabelle at Amalia hinihintay na

Tahimik ang showbiz dahil nasa vacation mode pa rin ang mga artista. Naka-focus noong Holy Week ang atensiyon ng mga tao sa pagpanaw ni Angelo, ang kontrobersiyal na pagkamatay ng asa­wa ng magician na si Alakim, at ang paglipat ni Derek Ramsay sa Kapatid Network.

Nagsampa ng reklamo laban kay Alakim ang mga kamag-anak ng kanyang misis na si Maricar dahil sa kanilang paniniwala na ang magician ang bumaril sa sariling asawa sa insidente na nangyari noong Martes Santo.

Inamin ni Alakim na nagkaroon sila ng pagtatalo ng kanyang asawa pero hindi na siya nagbigay pa ng ibang detalye. Namatay agad si Maricar dahil tumama sa dibdib niya ang bala ng baril habang nagtatalo sila ng kanyang mister na nakilala sa showbiz nang sumali at maging finalist siya sa Pilipinas Got Talent noong 2010.

Pero tapos na ang Holy Week kaya inaabangan na ng mga intri­gera ang muling pagsasabong nina Annabelle Rama at Amalia Fuentes.

Ang tanong, magkakaroon ba ng part two ang away nila na uminit ng husto sa Twitter o dededmahin na lang nina Annabelle at Amalia ang mga nangyari noong nakaraang linggo dahil lumamig na ang kanilang mga ulo?

Katrina at Kris stranded sa Palawan

Stranded sa El Nido, Palawan ang mag-dyowang Katrina Halili at Kris Lawrence dahil wala silang nasakyan na eroplano kahapon, pabalik sa Maynila.

Pinalipas nina Katrina at Kris ang Mahal na Araw sa Palawan na pamilyar na pamil­yar sa buntis na aktres dahil doon siya lumaki. It’s a must na makabalik ngayon si Katrina sa Maynila dahil may taping siya para sa My Beloved.

Marian at Dingdong nag-cultural trip sa Cambodia

Nagpunta naman sa Cambodia sina Marian Rivera at Dingdong Dantes. Cultural trip ang tawag ng dalawa sa kanilang biyahe noong Holy Week dahil pinuntahan nila ang mga templo at tourist spots sa Cambodia.

Bumalik din agad sina Marian at Dingdong sa Pilipinas dahil sa taping ng My Beloved na nagiging kapana-panabik ang mga eksena.

Raymond nag-gym sa buong Holy Week

Nagmumura na naman ang kaguwapuhan kahapon ni Raymond Gutierrez sa Showbiz Central.

Hindi nagbakasyon si Raymond sa ibang lugar noong Holy Week dahil nanatili lamang siya sa Metro Manila at nagpunta sa gym. Kitang-kita sa katawan ni Raymond ang resulta ng kanyang matiyagang pagpapapayat at disip­l­ina sa sarili.