Young Piolo Magbibida Sa MMK!

MANILA, Philippines - Matapos gampanan ang karakter bilang ‘Young Piolo Pascual’ sa pinaka­bagong teleserye ng ABS-CBN na Dahil sa Pag-ibig, sasabak naman ang batang aktor na si Francis Magundayao sa isang madamdaming Maalaala Mo Kaya episode kasama ang former child star na si John Manalo.

Ngayong Sabado (Marso 31), bibigyang buhay ni Francis at John ang mga karakter ng matalik na magkaibigang sina Meynard at Raymund na parehong nangarap na makasakay ng isang barko. Sa pag-abot ng kanilang munting pangarap, susubukin ang tatag ng pagkakaibigan ni Meynard at Raymund matapos silang itapon ng mga tauhan ng barko at 17 oras silang pumalaot sa dagat.

Kasama ni Francis at John sa MMK episode sina Emilio Garcia, Daisy Reyes, Nikka Valencia, Kyle Balili, Raye Barquirin, Hanna Flores, Jerome Ventenilla, at Elijah Magundayao. Ito ay sa ilalim ng pagsasaliksik ni Akeem Jordan del Rosario, panulat ni Arah Jell Badayos at direksyon ni Lino Cayetano. Huwag palampasin ang malupit na istorya ng pagkakaibigan ngayong Sabado ng gabi sa longest-running drama anthology ng Asya, ang Maalaala Mo Kaya (MMK), pagkatapos ng Wansapanataym.