"Weather Weather Lang Yan!"

CEBU, Philippines - Tin-aw ang signal ,pinaminaw sa masa ug nagpauso sa expression nga “istoryahee!,” mao kini ang deskripsyon sa usa sa mga disc jockeys sa MOR 97.1 Lupig Sila nga si Jacky G. sa dihang gipangutana sa Banat Hugyaw kung nganong padayon sila nga giidolo sa mga Sugbuanon.

Sa miaging mga survey, sila ang number 1 apan karon nahimutang na sila sa ikatulo nga puwesto. Hinuon gipasalig ni Jacky G. nga magpadayon ang paningkamot sa ilang puwersa aron makuha og balik ang korona. Reaksyon niya sa paghagba sa ilang ranking sa unang bahin niining tuiga: “weather weather lang yan!”

“‘Congratulations sa I FM!,” dugang pa niya.

Samtang gipaambitan ni Jacky G.nga kanunay gyud paminawon sa MOR kung unsa nga mga songs ang gipangita sa katawhan hinungdan nga wala’y hunong ang pagdukiduki nila sa mga sikat nga kanta karong panahona.

Nasayran nga mohimo og mga surveys sa mga kanta ang MOR hinungdan ila dayon nga mahibaw-an kung unsa nga mga kanta ang gipangita sa publiko.

“Kung unsa gusto sa majority, amo gyud na i-play,” matud pa ni Jacky G.

Gipasigarbo pag-ayo ni Jacky G. ang mga kaubanan niya nga mga DJ gumikan kay gipatigbabaw gyud niini ang kooperasyon busa dali ra masulbad kung ugaling makasugat sila og problema.

Sinemana ang panagtigom sa mga DJ sa MOR aron magpadayon ang kakusog nila sa masa.

“Dunay times nga halos dili na lang mi matulog kung dunay mga daghang buhaton sa stations,” suma pa ni Jacky G.

Matud pa niya nga daghang mga activities ang MOR sama sa pagpananom og kahoy sa kabukiran, medical mission, relief operations ug uban pa.

Nagkanayon si Jacky G. nga dili lang kutob sa paghatag og kalingawan ang ilang madalit sa publiko, kung dili mga serbisyo usab kung diin makatabang sila sa kalikupan ug komunidad.

Malipayon siya gumikan kay kung mopasiugda sila og tree planting, magbaha gyud kanunay ang ilang mga listeners nga boluntaryo nga mohatag sa ilang serbisyo.

“Balewala ra nang kahago, basta ang importante nga makatabang lang gyud mi,” dugang pa ni Jacky G.

Usa sa uso karon nga format sa programa sa bisan asa nga istasyon mao ang pagtambag sa suliran sa gugma ug si DJ Ace maoy ilang pambato niini.

Apan nagpalahi sa Ace sanglit gibahin niya ang iyang programa ug iya kining gigahinan og debate aron mas hugyaw kini paminawon.

Ang bag-ong personalidad sa MOR nga si DJ Kimyat mipadayag nga bisan bag-o siya sa industriya padayon gihapon siya nga maningkamot ug wala niya igsapayan ang kompetisyon.

“Basta ako, trabaho ra gyud ko kay kita tanan dili man gyud ta perfect,  Ang pinaka-importante nga malingaw ang atong listeners,” suma pa ni Kimyat. (BANAT NEWS)