Coco, Valerie ug daghan pa mupasundayag

CEBU, Philippines - Kanunay nga pangitaan og artista sa iyang mga higala hangtud nga nakahunahuna nga magtukod na lang gayud og agency nga mumugna og mga shows sa mga artista nga nagikan sa kaulohan.

Kini maoy istorya, luyo sa pagkaumol sa M-Talent Events and Promotions nga pormal nga ilusad ugma puhon sa hapon diha sa Barangay Ibabao, Mandaue City. Kini maoy labing bag-ong negosyo sa magpapatigayon nga si Aida “Angging” Patana.

Aminado si Angging nga siya mismo ganahan gayud mutan-aw og mga programa sa telebisyon sukad pa niadtong high school student pa lang siya didto sa Mindanao. “Sa una, daghan kay ko’g friends ang mohangyo nako kung duna ba kuno ko’y kaila nga tawo nga dunay kontak sa mga artista. Mao ‘tu nakahuna-huna ko nga maghimo nalang og agency, kay duna may nindot nga opportunity,” matud pa ni Angging.

Ang iyang paghigugma sa showbiz ug mga artista, miganoy niya aron mahimamat niya ang mga tawo nga konektado sa industriya hinungdan nga nakahigala siya og mga managers sa Manila, lakip na niini ang mga taga Star Magic.

Gani, isip opening salvo sa M-Talent Events and Promotions, pabahaan siya sa Star Magic og mga artista, diha mismo sa tindahan, ang Carmall diha sa Ibabao, dakbayan sa Mandaue ugma puhon. Lakip sa kumpirmadong mupasundayag sila si Coco Martin, Valerie Concepcion, Aaron Villaflor, Justin Lee, Bugoy Drillon, Liezel Garcia, Monica Sacay, K-La Rivera, Daniel John Ford Padilla, Dondon Hontiveros, Hansen Nichols ug Kevin Andrew Fowler.

Ugma sa udto muabot ang mga artista nga mudiretso sa Pino Restaurant ug pagkahuman mupahigayon og motorkada gikan sa dakbayan sa Sugbo, diretso na sa Mandaue.

Pasabot pa ni Angging sa Banat News Hugyaw nga karon nga naumol na ang M-Talent Events and Promotions mas mapadali na ang negosasyon tali sa mga kliyente nga naglaraw pagkuha og serbisyo sa mga artista ug sa maong mga personalidad. Dungan niini, mas menos pud niya pa ang bayranan gumikan kay direkta man ang iyang negosasyon ngadto sa mga managers mismo.

“Minos na lang gyud siya, kay sa una nga pamaagi daghan pa og tawo nga agian aron makakuha og artista pero sa among pamaagi, deretso nami og kontak sa Manila,” nagkanayon siya.

Dungan niini, malipayong gipahibawo ni Angging nga ang iyang kompaniya maoy gikuha sa kagamhanan sa Mandaue alang sa ilang mga kalihukan sa nagsingabot nga kapistahan sa dakbayan karong Mayo, diin magbaha matud pa ang mga artista unya, alang sa nightly activities.

Dugang pa niini, may nakalinya na usab sila nga mga events alang sa dagkong malls, diin ang maong kumpaniya maoy gikuha nga organizer.

Samtang, gawas nga magsilbi ang M-Talent Events and Promotions nga booking office, mupasiugda usab kini og nagkadaiyang workshops sa pag-awit, pag-arte, pagsayaw ug modeling, karong bakasyon diin mga showbiz personalities gikan pa sa Manila ang mubarog nga mentors ug coaches.

Si Angging gradwado sa kursong Hotel Restaurant and Management ug usa siya ka single mom sa lima niya ka mga anak.

Matud pa niya nga basta maningkamot lang ug may tiunay nga determinasyon, magmalampuson gayud.

Ug bisan sa iyang ka-busy sa negosyo, dili gayud matud pa siya magmakawang paggahin og oras alang sa iyang mga anak, sanglit sila maoy iyang inspirasyon.

Gawas sa M-Talent Events and Promotions, nanag-iya pud siya og salon, hardware, car shop, printing press, ug travel agency.

GMA-7 Cebu way klaro?

Fans ni Pacman sa Sugbo nasagmuyo

Nasagmuyo ang pipila sa mga fans ni Manny Pacquaio gumikan kay wala sila makaapil sa programa niini nga Manny Many Prizes nga nag-taping diha sa Lapu-Lapu Hoops Dome niadtong Huwebes.

Si Cheryl Labastida nga taga Barangay Lahug, misaysay sa Banat News Hugyaw kagahapon nga ang iyang inahan ug laing tulo niya ka mga silingan ang nangadto sa GMA-7 sa Nivel Hills niadtong Huwebes sa buntag aron mangayo og ticket sa show ni Manny.

Pagka-kuha sa ticket, gikatahong giingnan sila sa staff nga moadto sa Hoops Dome karong adlawa, March 24 ug mao usab kini ang nakabutang sa ticket.

 Nagkanayon si Cheryl nga nasagmuyo pag-ayo ang iyang mga silingan kay dili lalim ang kahago niini sa pag-adto nila sa estasyon. “Nakabutang man gud sa ticket kay Saturday, unya murag naay inirisan,’ tug-an pa ni Cheryl kagahapon. Matud pa niya nga excited na unta kaayo ang iyang mga silingan apan naminghoy kini sa dihang nahibaw-an nila nga wala na diay duwa nga mahitabo karong adlawa. “My heart was broken. I fell for my mom and the rest of the gang. They told me that Analie Otofeo (neighbor) called GMA and tried to complain but was told by unknown man that, “Gibalita mana gahapon dai, wala diay mo namati og tarong?,” ni Cheryl pa.

Apan usa sa mga staff sa GMA-7 Cebu nga maoy in-charge sa pag-apod-apod og ticket nga si Gerome Tigley nagkanayon nga hayan na-mis interpret lang ang maong sitwasyon. Matud pa niya nga dunay “ginagmay nga error” sa petsa nga nakabutang sa ticket apan iyaha gyud nga giingnan ang mga reklamante nga moadto inig kahapon niadtong adlawa didto sa Lapu-Lapu. Suma pa ni Tigley nga nangadto sa Lapu-Lapu ang kasagaran sa mga tawo nga iyang gihatagan og ticket.

“Daghan man ko og gitagaan og ticket, sila raman ang wala mangadto sa Lapu Lapu, na-misinterpret lang tingale nila,” nagkanayon si Tigley.

Samtang ang manager sa GMA-7 Cebu nga si Anne Marie Tan misaysay nga wala sila nagkuwang sa paghatag og impormasyon, gani ang skedyul sa taping sa MMP kanunay nila nga gi-plug sa telebisyon ug radyo.