I numero uno!

CEBU, Philippines - Naangkon na pagbalik sa 93.9 I FM ang labing una nga puwesto basi sa labing bag-ong resulta sa survey sa unang bahin niining tuiga.

Kini maoy gibutyag sa manager sa maong estasyon si Raul Credo kinsa mapasalamaton sa mga listeners gumikan kay mao kini ang hinungdan kung nganong nakuha nila pagbalik ang korona. Katapusan nila nga nahimong number 1 niadtong 1st ug 2nd quarter sa miaging tuig pa.

“Thank you kaayo sa gihatag ninyo (listeners) nga suporta sa 93.9 I FM, pasalig namo nga ipadayon namo ang paghatag og kalingawan ug pag-play sa paborito ninyo nga songs,” suma pa ni Credo sa interview sa Banat News Hugyaw.

Gipadayag ni Credo nga lig-on ang I FM gumikan kay ang tanan nga DJ niini nagkahiusa ug patas usab ang pagtratar nga iyang gihatag ngadto sa iyang mga ginsakpan.

Matud pa niya nga patok karon sa masa ang mga programa nga manambag sa mga tawo nga naghambin karon og problema sa gugma ug mao na kini karon ang kasagaran nga gidalit sa nagkadaiyang FM stations.

Ang “Dear I FM” ni DJ Randy  maoy usa sa sikat nga programa sa afternoon slot kung diin nagbaha ang mga callers niini aron mopadangat sa ilang suliran sa gugma inubanan usab sa makatandog nga awit.

Gipahibalo usab ni Credo nga nagpabiling humot sa publiko ang programa ni DJ Radcliffe nga “I Share” ug gihulagway niya nga mao kini labing pinaminaw nga programa panahon sa kagabhion.

Dugang pa niya nga bisan nagbaha na karon ang bag-ong kahimanan sa modernong teknolohiya sama sa computer, iPad ug uban pa, wala kini makahatag og hulga sa radio industry.

“Sa radio, diha nimo ma-feel ang importansya sa mga disc jockey, kung maminaw lang ko og music sa imo computer, di ba plain lang siya? Kung sa radyo, dunay mga disc jockey nga molingaw sa mga listeners,” punto pa ni Credo.

Nagikan si Credo sa nagkadaiyang stations hangtud gidawat niya ang hagit nga mahimong kabahin sa I FM niadtong tuig 2002.

Aminado siya nga dunay mga tuig nga nihinay ang istasyon gumikan kay dunay ubang  DJ nga mi-resign, apan nabawi ra dayon kini human nagdugang sila og mga personalidad.

Gipaneguro ni Credo nga ang kanta nga ilang ipalanog sa kahanginan dali nga mauyonan sa mga tigpaminaw.

Aron magpabilin sila nga numero uno, gipasalig ni Credo nga ilang mintinahon ang ilang estilo sa paglingaw ngadto sa listeners. (BANAT NEWS)