Ngayong sakitin na ang comedy king, Zsa Zsa hindi na umaasang makakasal pa sila ni Dolphy

Sayang at hindi na pala matutuloy ang pagpapa­kasal nina Dolphy at Zsa Zsa Padilla. Hindi naman ito ipinagsisintir ng magaling na singer-actress dahil sa hindi magandang kalusugan ng hari ng komedya. Ipinagpapasalamat na lamang niya na nakalabas na ito ng ospital at nasa kanilang bahay na.

Erich todo-bigay sa lampungan kay Derek

Mukhang nakatulong ng malaki ang pagiging matagal na shooting ng Corazon: Ang Unang Aswang. Mas napaganda ito hindi lamang sa punto ng pagiging isang nakakatakot na pelikula kundi sa pagiging isang magandang love story complete with heated love scenes between Derek Ramsay and Erich Gonzales na hindi patatalbog sa mga eksena ng nababalitang Kapamilya actor na magiging isa nang Kapatid sa blockbuster niyang pelikulang No Other Woman where he got to romance both Anne Curtis and Cristine Reyes.

Sinabi ng direktor na si Richard Somes na ang Corazon: Ang Unang Aswang ang pinanggalingan ng lahat niyang horror films. Kumuha ito ng inspirasyon sa pelikulang Dracula. Pinaniniwalaan niyang mas mapapatatag pa nito ang pagiging isang most important actress ni Erich in the very near future.

“She may need a lot of guidance but she’s going to be important,” paniniyak niya.

Kung malaki ang tiwala ni Somes sa kanyang bidang babae ganundin kay Derek na sa lakas ng ibinuhos na galing sa kanyang pag-arte ay nagawang very powerful ang ending ng pelikula.

“Mahal na mahal ko ang Corazon, it’s my favorite project. It serves as the highlight of my career and it’s finally out,” sabi niyang may pagkagulat nang may nagpasok ng isyu ng billing dahil mas nauna ang pangalan niya kay Erich.

Inamin ng itinuturing na ‘man of the hour’ na wala siyang alam dito at kahit saan ilagay ang kanyang pangalan ay okay sa kanya. Ang mahalaga alam niyang kasama siya at may mahalaga siyang role sa pelikula.

Marami ang nagsasabi  na baka ma-revive ang isyu sa dalawang kapag ipinalabas na ang peliku­la. Kung sa No O­ther Woman ay may wild love scene si Derek kay Anne Curtis, napakainit din ng love scene nila ni Erich sa Corazon.

“Hindi ito wild pero as passionate as the scenes Anne and I did,” ani Derek.

Walang pagtutol na narinig mula kay Erich maski na nang sabihin sa kanya ng direktor na kailangang nakabuka ang kanyang bibig sa halikan nila ni De­rek.

Palabas na ang Corazon: Ang Unang Aswang sa Marso 14. 

 Jake hindi nakakatapos ng kanta dahil dinudumog ng fans

Hindi ko naman masisi si German Moreno kung sa tuwing mag-uusap kami ay ang alaga niyang si Jake Vargas ang topic. Hindi na niya kailangang hilingin sa akin na isama ito sa aking co­lumn dahil nakikita ko naman ang malaking progress ng kanyang alaga na dati ay ipinakikiusap lamang niya sa GMA7 na bigyan ng project pero ngayon ay nagkukusa na ang network na bigyan ito ng assignment.

Kagagaling lang nilang dalawa ni Jake sa Singapore na kung saan kinunan ang ilang eksena ng Pepito Manaloto na malapit nang magwakas. Dumating sila dun ng Feb. 23, nag-tape ng Feb. 24 at balik na sila ng bansa ng Feb. 25 ng 11:55 p.m. Hindi na sila umuwi ng kani-kanilang bahay, diretso na sila ng San Jose del Monte, Bulacan na kung saan ay may kapistahan na dadaluhan para kumanta si Jake.

Kahit lampas ng hatinggabi, sumama sina Kuya Germs sa mga nag-abang sa kanila sa airport. Nahirapan pa rin silang puntahan ang venue dahil hindi umalis ang mga taong naghihintay. Pero nakadalawang kanta lang si Jake. Hindi na niya natapos ang ikatlo dahil dinagsa at dinumog na siya sa stage ng mga tao.

Natatawa na lamang si Jake habang ikinukuwento ito sa amin sa presscon ng My Kontrabida Girl na kung saan ay tampok ang love team nila ni Bea Binene. Naging in demand sila for interview dahil wala ang dalawang bida ng pelikula na sina Rhian Ramos at Aljur Abrenica.