FHM nangayog pasaylo, Bela mipasabot

CEBU, Philippines - Giusab sa FHM Philippines ang cover photo sa ilang March issue nga nagpakita kang Bela Padilla nga gi-alirungan og lima ka Nigerian models.

Kahinumduman nga napatik sa Banat News Hugyaw kagahapon nga may grupo nga mihulagway sa maong cover nga dili makiangayon ngadto sa mga itom og pamanit o “racist.”

Kini gumikan sa blurb nga “Bela Padilla stepping out from her shadow.” Suma pa sa grupo, ang pulong “shadow” maoy naghimo sa cover nga dili makiangayon sanglit daw gipakasamag anino lamang ang may mga itom og pamanit.

Suma pa sa FHM management human sila nakadawat og daghang pagsaway ug reklamo dihang gi-upload ang maong cover photo ni Bela sa ilang Facebook page adtong Sabado sa gabii, nahukman nga usabon o ilisan ang hulagway.

Pwes, gibakwi sa management ang mga kopya sa magazine nga na-release. Ilang gipasalig nga sa subling paggawas niini, lahi na nga hulagway ni Bela ang makita.

“When FHM hits the stands in March it will have a different cover. We deem this to be the most prudent move in the light of the confusion over the previous cover execution.” 

“We apologize and thank those who have raised their points. We apologize to Bela Padilla for any distress this may have caused her,” tipik sa pamahayag sa FHM management.

Samtang si Bela pinaagi sa iyang Twitter account, nagkanayon nga dili matud pa niya tuyo nga mupasakit og mga pagbati o aron may masilo niya.

Ang iya matud pa nga cover photo nagpasabot nga mugawas na siya gikan sa anino sa iyang mga kahadlok ug pagduhaduha. Dugang pa niya ang mga models matud pa nagsimbolo sa iyang mga anino nga iya na nga nabuntog.

“The concept of my @FHMPhil cover was stepping out of MY inhibitions MY fears and MY shadows. Not belittling any race. :)

“The title provided by @FHMPhil is in connection with the article and has NOTHING to do with skin colors.

“The girls on my cover Of @FHMPhil symbolize the different sides of ME that I have outgrown and am ready to step out of. Let’s be open minded,” sunodsunod nga tweets ni Bela adtong Lunes.

Grace Lee gihimakak ang pamasangil

Hingpit na nga mitingog ang Koreana nga si Grace Lee kabahin sa pagtumbok kaniya nga rason sa iyang kauban nga disc jockey sa Magic 89.9 nga si Angelicopter.

Kahinumduman nga nangangkon ang kanhi Survivor Philippines Doubles Showdown castaway nga gitangtang siya sa management sa nahisgutang estasyon gumikan sa deklarasyon matud pa ni Grace nga dili na siya ganahan makig-uban niini sa programa nila ni Mo Twister, “Good Times.”

Ang istorya mao nga may usa ka higayon nga managsama silang duha nga may gidapit nga guest para sa programa, hinungdan nga nasuko si Grace ug didto nagsugod ang guna sa ilang panaghigalaay.

Miingon si Angelicopter nga makadaghan siya misuway og pakig-istorya kang Grace apan nagmagahi matud pa ang nahisgutan.

Apan matud pa ni Grace sa interview kaniya adtong Lunes sa gabii, dili siya maoy rason nganong natangtang si Angelicopter, dili matud pa kini tinuod nga siya maoy nakaingon nga nawad-an kini og trabaho.

Si Angelicopter mismo matud pa nasayud nga makadaghan na gitawag sa management ang attention niini ug sayud ang nahisgutan sa tinuod nga rason sa iyang pagkatangtang isip dj.

Suma pa ni Grace, dili tinuod nga makadaghan misuway pagpakig-istorya si Angelicopter kaniya, kausa ra matud pa kini mi-text ug iya kining gitubag.

Ang nasakitan ni Grace kay gihisgutan pa gyud matud pa ni Angelicopter si Presidente Noynoy Aquino nga ang pagkatangtang matud pa sa nahisgutang dj niadto pang Disyembre. Nahitabo matud pa kini duha ka semana sa wala pa sila nagsugod og date sa presidente.

Hinungdan nga naglibog siya nganong karon pa migawas ug nagpa-interview si Angelicopter nga dugay naman nahitabo ang iyang pagkatangtang.

Suma pa niya nga upat na matud pa siya ka tuig sa industriya isip dj ug talent sa GMA-7, daghan na matud pa siya og mga nakatrabaho ug silang tanan mahimong pangutan-on kun tinuod ba nga wala siyay batasan. Maayo matud pa ang iyang pagpakighugoyhugoy bisan ngadto sa mga ordinaryong empleyado.

Dugang pa niya, dili na lang unta siya mutingog pa kabahin sa isyu kay may mga tawo man nga makadepensa niya, apan daghan matud pa ang nanggawas nga istorya nga dili tinuod nga nakapasakit sa mga mahal niya sa kinabuhi.

Galvante miritiro

Hingpit na nga gipahibawo sa GMA Network Inc ang pagretiro na ni SVP for Entertainment TV Wilma Galvante pinaagi sa usa ka press statement kagahapon.

Si VP for Drama Lilybeth Rasonable maoy gitudlo sa tagdumala isip officer-in-charge sa Entertainment group.

Suma pa sa statement si Galvante “officially retired” gikan sa network human sa 19 ka tuig nga pagserbisyo isip Entertainment head.

Samtang si Rasonable nagsugod og trabaho sa network adtong 1998 ug natudlo na nga “Program Manager, Assistant Vice-President ug Vice-President for Drama for the Entertainment Group.”

Sarah G. Live gihangop, gipakpakan!

Gihangop gayud sa mga fans ni Sarah Geronimo ang iyang weekly self-titled show nga milugwa na adtong Domingo sa ABS-CBN: Sarah G. Live!

Kini kay ikaduha ang nahisgutang show sa kinatibuk-ang sultada adtong adlawa suma pa sa Kantar Media TNS nationwide rating.

Apan ang press release sa kapamilya network kabahin sa Top 20 shows adtong Pebrero 26, nagpakita nga wala malakip sa labing gitan-aw nga programa sa maong adlaw ang The Buzz, nga kanunay unta nga masulod sa maong ranking.

Wala pud masulod ang katigi niini nga Showbiz Central ug ang youth-oriented show sa GMA-7, Tween Hearts. Nasulod ang bag-ong youth-oriented show sa ABS-CBN, ang Luv U. (BANAT NEWS)