Whitney buot makakita ni Kristo

CEBU, Philippines - Nagpunay matud pa og hisgot kang Jesus Christ si Whitney Houston sa katapusan niyang mga adlaw dinhi niining kalibutan. Kini maoy gibutyag sa mga higala ni Whitney ngadto sa TMZ.com. Suma pa nga nagpunay matud pa og ingon si Whitney nga buot niyang makakita kang Jesus Christ ug nabatyagan niya nga hapit na kini matuman. Human matud pa sa iyang performance adtong Biyernes sa usa ka event didto sa Hollywood miingon matud pa si Whitney nga "Yes Jesus Loves Me" ug miingon matud pa kini sa iyang mga higala, "I'm gonna go see Jesus ... I want to see Jesus."

Pipila ka oras sa wala pa siya namatay, gituki matud pa ni Whitney ang usa ka passage sa bibliya kabahin ni John the Baptist ug Jesus, diin mapahiyumon kining namulong, "You know, he's so cool ... I really want to see that Jesus." Mitug-an pud matud pa si Whitney sa iyang mga higala nga hapit na muabot ang iyang panahon ug gisiguro niini nga nagsimba ug nagpasidungog siya sa Ginoo kutob sa iyang mahimo sa tanang panahon.

Album ni Whitney nahibalik sa music billboard

Human namatay si Whitney Houston niadtong Pebrero 11, nagpusotpusot pagbalik ang popularidad sa iyang album nga "Whitney: The Greatest Hits" kung diin nasulod kini sa Billboard 200 chart ug nahimutang sa ika-number 6. Suma pa sa Nielsen SoundScan, nahalinan na ang maong album og 64,000 ka mga kopya sukad sa iyang pagkamatay.

Nasayran nga misaka og 10,419% ang sales niini kumpara sa mga milabay nga mga semana nga nahalinan lang kini ubos sa 1,000 ka kopya. Nasulod usab sa music billboard ang iyang self-titled album nga   "Whitney Houston" ug nahimutang kini sa ika-number 72 uban sa 82,000 ka kopya. Nahalinan usab og 5,000 ka kopya ang iyang srudi album nga "I Look To You". Ang sound track sa “Preacher's Wife” mikita og 4,000 ka kopya.

Boy nahiubos kang James Ingram

Nahiubos ang King of Talk nga si Boy Abunda ngadto sa American singer nga si James Ingram human napakyas kini pagtungha sa iyang segment nga “Ikaw Na” sa programang "Bandila" niadtong Miyerkules sa gabii.

Giingong daghan og gilakaw si James sa maong adlaw hinungdan nga gikapoy na kini.

“Yes, we did prepare for that interview, masakit man because I was a fan of James Ingram," suma pa ni Boy. Suma pa ni Boy nga nakasabot siya sa sitwasyon bisan paman nga naguba ang plano sa iyang segment.

"Sabi ko nga kanina bago mag-umpisa, I'd rather not do an interview with someone who's not happy to do the interview. Pero ganoon talaga ang moods ng mga artista. Pero I feel for the promoters, they were very apologetic. Kami naman, sabi namin mabubutas ang aming palabas. Pero it really happens.But I have so much respect for the guy as a musician,” dugang pa sa TV host.

 Gipasalig ni Boy nga bisan pa man sa maong hitabo, iyaha gihapon nga giidolo ang singer.

Pauleen: “Hindi po ako buntis”

"Pero... buntis ba kaagad? Hindi ba puwedeng pagod lang?" Kini mao ang sunod-sunod nga pamahayag ni Pauleen Luna kabahin sa mga pagduda nga hayan mabdos siya hinungdan nga nakuyapan siya sa remote telecast sa Eat Bulaga didto sa Davao adtong Lunes sa udto.Suma pa niya nga gikataw-an na lamang matud pa sa mga dabarkads ang nahitabo gumikan kay nasayud sila unsay tinuod ug dili matud pa maoy unang higayon nga nakuyapan siya, may history na matud pa siya kabahin niini. Matud ni Pauleen nga gikapoy lamang gayud siya adtong adlawa ug kuwang matud pa siya og katulog. Labihan pud matud pa ka init adtong adlawa didto sa Davao.

"Parang na-drain lang talaga ako. Saka may history na rin kasi ako ng himatay. "It's not the first time. So, hindi po ako buntis," niya pa. Sa sunod nga mga remote telecast sa Eat Bulaga kinahanglan lang gyud matud pa niya nga sakto og pahuway ug mukaon sa tukmang oras.

“Officially” P18.5M ang first day

Nagpiyesta ang Star Cinema kagahapon gumikan kay mikabat matud pa sa P18.5 million ang opening day gross sa pelikula nga “Unofficially Yours” starring Angel Locsin ug John Lloyd Cruz.

Mas dako pa gani matud pa kini sa opening gross sa second highest grossing film of all time nga “No Other Woman” nga mitala lang og P15 million sa unang adlaw niini sa mga sinehan.

Ang nahisgutang pelikula gibituonan nila ni Anne Curtis, Derek Ramsay ug Cristine Reyes. Mikita kini og P282.5 million sa kinatibuk-an.

Samtang sugod kagahapon, tagduha na matud pa ka mga sinehan ang nagpasalida sa matag dapit o mall lukop nasud, gumikan sa kadaghan sa mga tawo nga buot mutan-aw sa unang pelikula nila ni Loydie ug Angel.

Ang Unofficially Yours pelikula ni Cathy Garcia-Molina nga nagtuki sa casual sex.