Maxene mokanta gihapon

CEBU, Philippines - Bisan sawayon pag-ayo ang tingog ni Maxene Magalona sa higayon mokanta siya sa entablado, magpadayon gihapon siya sa pagkanta gumikan kay usa kini ka pamaagi nga mahanas puhon ang iyang tingog.

G Tongi ganahan mag-direktor

Tsika pa ni G Tongi nga nangandoy siya nga mahimong direktor sa usa ka pelikula busa dili gyud siya magduha-duha sa pagdawat kung matagaan siya og tsansa nga makahimo sa maong butang.

GMA ra’y pilion

Usa sa birthday wish ni Luis Alandy mao nga makabaton og ekslusibo nga kontrata sa GMA-7 ug siya nagmalaumon nga matuman kini karong tuiga.

Aiko nahugyaw kang David

Nahimong instant fan kang David Archuleta ang aktres nga si Aiko Melendez human siya nahugyaw sa tingog sa singer sa usa nila ka eksena sa seryeng Nandito ako sa TV 5.

Gab mi-deny sa intriga

Giklaro ni Gab Valenciano nga dili pa siya andam mosulod pagbalik sa usa ka relasyon human sa break-up nila ni Isabel Oli hinungdan nga iyang gihimakak ang intriga nga naglambigit sa iyang pangalan ngadto kang Coleen Garcia.

Kapuso ug Kapatid

Gikatahong malakip si Gabby Concepcion sa umaabot nga drama series ni Richard Guttierez sa GMA-7. Kasamtangan karon nga gihikay ang schedule ni Gabby aron dili ma-conflict ang oras niini sa mga programa niya sa TV 5.

Dili na gyud mapugngan

Desidido na gyud si Hayden Kho Jr. nga mobalik sa showbiz ug kever lang siya kung dunay mga tawo nga kanunay magbalik-balik og hisgot sa iyang sex-video scandal kaniadto. Tsika pa ni Hayden nga iyaha na nga gikalimtan ang bati niya nga mga kaagi.

David mawili sa TV 5

Bukas si David Archuleta nga mobuhat og laing proyekto sa TV 5 kung sa higayon nga matapos na ang serye niya nga Nandito Ako. Gidayeg ni David ang mga kaubanan niya sa maong serye gumikan kay mainiton siya nga gihangop niini busa mawili gyud siya sa nahisgutang istasyon.

Pasalig ni Dennis

Gipasalig ni Dennis Trillo nga dili gyud niya sipyaton ang pagtambong sa graduation ceremony ni Bianca King kinsa matapos na sunod buwan sa gikuha niini nga kursong digital filmmaking sa St. Benilde sa La Salle. Ang duha gidungog nga hagbay ra nga nagkahigugmaay.

Rayver mikatawa lang sa intriga

Gikataw-an lang ni Rayver Cruz ang report nga matud pa under siya sa iyang girlfriend nga si Cristine Reyes. Depensa pa ni Rayver nga dili kini mahitabo sanglit pareho sila ni Cristine nga kabalo mosabot sa bisan unsa nga sitwasyon.

Marian miduaw sa TV 5

Miduaw si Marian Rivera sa last taping day sa mini-serye ni David Archuleta sa TV 5 nga Nandito Ako. Si Mac Alejandre maoy direktor sa maong serye ug nakatrabaho kini ni Marian sa pipila ka mga proyekto sa GMA-7.

Ad agency mikisikisi

Nanawagan ang advertising agency nga naggunit sa milk brand nga giduso nila ni Carmina Villaroel ug Claudine Barreto kang Dolly Anne Carvajal pagbakwi sa iyang gisuwat sa milabay nga semana.

Kahinumduman nga gisuwat ni Carvajal sa iyang column sa Philippine Daily Inquirer nga matud pa nag-walkout si Carmina sa shoot sa ilang milk commercial gumikan sa kadaghan matud pa og demands ni Claudine.

Apan gihimakak kini ni Carmina kay wala gayud matud pay ingon niini nga hitabo ug katapusan nilang panagkuyog ni Claudine alang sa maong commercial niadto pang duha na katuig ang milabay.

Suma pa ni Carmina nga maayo ang relasyon nila ni Claudine ug sukad sukad walay higayon nga nag-walkout siya sanglit labihan niya ka pasensyosa og mga ingon niini nga sitwasyon.

Samtang ang ad agency miingon nga walay basehan ang gisuwat ni Carvajal hinungdan nga ila gayud kini nga gibara. Gihulagway nga "baseless, false, and unfounded" ang maong balita busa gipanawagan ang pagkorehi ni Carvajal sa isyu.

Samtang si Dolly mihatag dayon og statement kalabot sa gibuwelta sa maong agency ug kini nagkanayon,"I stand by my story”.

Matud pa niini nga wala niya dauta ang produkto ug iyang giklaro nga wala siya mag-mention sa pangalan sa produkto.

"That's their prerogative. Of course they have to do damage control and protect their endorsers,”matud pa ni Dolly.