Life and Style magbabalik-tanaw sa 2011

MANILA, Philippines - Pinili ni Mader Ricky ang mga natatanging episode ng kanyang programang Life and Style With Gandang Ricky Reyes na ipinalabas nung Taong 2011 at muling mapapanood ang mga ito ngayong Sabado alas-diyes nang uma­ga sa GMA News TV.

Unang-una ang makabagbag-damdaming paglilipat ng mga batang maysakit na cancer mula sa naging tahanan nila sa pitong taong Childhaus. Luha at lungkot ang nasa mukha ng mga pasyente at kanilang mga magulang nang makatanggap ang mga tagapamahala ng bahay-tuluyan sa E. Rodriguez Aven­ue, Kyusi ng eviction notice mula sa PCSO.

“Saan na naman sila matutulog? Sa kalye at mga koridor ng ospital? Tatlong linggo bago ang itinakdang pagpapaalis sa ami’y nakatagpo kami ng isang bahay sa Ofelia Village, Project 8, Kyusi. Nalinis, nahilamusan ng pintura at nalagyan ng mga kagamitan at kasangkapan ang bahay at nailipat ang mga pasyente na ngayo’y tuwang-tuwa sa tinutuluyang Childhaus na ayon sa kanila’y isang palasyo o mansyon,” sabi ni Mader RR.

Naibigan ng mga televiewers ang mga pagdalaw ng show sa ibang lugar tulad ng Bangkok at Macau na ‘di lang ang kagandahan ng lugar ang itinampok kundi maging mga modernong paraan ng pagpapaganda at pampapabata. Patok din ang pagdalaw sa iba-ibang rehiyon sa bansa na nabusog ang ating mga mata sa tourist attractions, nabusog ang ating tiyan sa masasarap na pagkain at natutuhan natin ang ”livelihood program” ng mga taga-roon.

 Bilang pagbati sa Taong 2012 ay magbibigay din si Mader ng mga pagbabago (innovations at formats) sa programa kaya ... abangan ito!