Dingdong kever sa mi-question sa iyang pagka best actor

CEBU, Philippines - Gipalanog ni Dingdong Dantes nga mas gitahod niya ang institusyon nga maoy naghatag niya sa iyang labing unang acting award, busa mas mutuo siya niini, inay maminaw sa mga pagsaway nga iyang nadawat gumikan sa iyang kadaugan.

 Ang best actor sa 2011 Metro Manila Film Festival pinaagi sa pelikulang Segunda Mano nagkanayon nga kumbinsido siya sa kredibilidad sa nahisgutang organisasyon busa dili siya apektado sa pagsaway sa uban nga dili siya haom sa iyang nadawat nga pasidungog. Nasayran nga mao ni labing unang acting award ni Dingdong hinungdan nga namahayag siya nga lahi ra gyud matud pa ang bation kun makadaog og ingon niini sanglit kamatuoran kini nga may nahimo siyang maayo isip artista.

 Kaniadto matud pa giisip niya nga bonus na lang ang acting award, apan dihang nasayran niya nga siya maoy midaog, labihan matud pa katam-is sa iyang natagamtam nga kalipay.

 Wala si Dingdong sa award’s night sa milabay nga semana sanglit didto na sila sa Boracay nagbakasyon kauban ang iyang uyab nga si Marian Rivera ug ang iyang pamilya.

 Wala gyud matud pa siya magdahom nga siya maoy mudaog hinungdan nga diriyot siya mahagbong sa iyang gilingkuran pagkasayud niya sa maayong balita. Inspirasyon ni Dingdong ang iyang acting award aron niya pa mas muhimo daghang nindot nga mga pelikula karong 2012.