Maanyag nga mga kadaugan

CEBU, Philippines - Usa ka mabulukong tuig para sa Pilipinas ang 2011 kung natad sa indigay sa kaanyag ang hisgutan, diin wala gyud magpaulahi ang atong utokan ug maanyag nga mga pambato human nila gibalik ang dungog sa Pilipinas sa mga international pageants.

Human sa 4th runner-up place ni Venus Raj niadtong 2010, ang magna cum laude graduate sa University of the Philippines (UP) ug architecture licensure board exam topnotcher nga si Shamcey Supsup maoy nakapasaka sa ranggo sa Pilipinas sa labing prestihiyoso ug inahan sa tanang beauty pageants, ang Miss Universe 2011 diin siya nahimong 3rd runner-up.

Ang 25-anyos nga dalaga gikan sa General Santos City, nga mao sad ang yutang natawhan sa Pambansang Kamao - Manny Pacquiao, maoy nangulo sa online voting ug sa online fan voting atol sa question and answer portion sa 60th Miss Universe Pageant niadtong Septiyembre sa Sau Paolo, Brazil.

Atol sa Q & A, ang judge nga si Viviva A. Fox nangutana ni Supsup: “Would you change your religious beliefs to marry the person that you love? Why or why not?”

Sa walay pagkanga, nitubag dayon si Shamcey: “If I had to change my religious beliefs, I would not marry the person that I love because the first person I love is God, who created me. I have my faith and my principles, and this is what makes me who I am. And if that person loves me, he should love my God, too.” Gikonpirmar pod ni Shamcey nga taken na siya ug ang swerteng lalaki mao ang Filipino-Chinese model nga si Lloyd Lee.

Human nibuwag ang Miss World ubos sa Bb. Pilipinas ug gidumala na sa socialite nga si Cory Quirino mi-arangkada pod ang pambato sa nasud nga si Gwendolyn Ruais niadtong Nobiyembre 6 sa Earls Court Two sa London.

Ang French-Filipino nga model maoy mikulit og balik sa mapa sa Pilipinas human na-first runner-up si Evangeline Pascual niadto pang 1973 sa London gihapon.

“People asked me why I stopped modeling when I was doing well. My answer, when you’re modeling, you do it for yourself. It’s a personal thing. But when you join Miss World Philippines, you represent the country. You’re an ambassador. You can help other in the causes you believe in,” lenggua pa ni Gwen.

Ang Miss World crown na lang, hangtud karun and wala pa gyud madughit sa Pilipinas. Kanus-a kaha nato kini maangkon? Gawas sa pagkadaug niya isip First Princess, si Gwendolyn usab ang napiling Continental Queen of Beauty for the Asia Pacific.

Samtang bisan og wala makakuha og titulo, pasok sa bangga gihapon ang 19-anyos nga si Dianne Nepomuceno sa Miss International 2011 didto sa Chengdu, China, human siya nalakip sa top 15 ug nakadawat sa People’s Choice Award.

Cebu beauties

Dinhi sa Sugbo , wa gyud pakyasa ni Rogelie Catacutan ang mga Sugbuanon human niya nalangkat ang grandslam title sa Miss Aliwan Festival 2011. Wala gyud maputol ang pagpanghawod sa mga Cebuana niining maong indigay sa kaanyag didto sa kauluhan.

Gisugdan kini ni Rizzini Gomez niadtong 2009 ug gisegundahan ni Sian Elizabeth Maynard niadtong 2010 ug gikumpleto gyud ni Rogelie ang grand slam alang sa Cebu.

Ang nursing graduate sa University of San Jose-Recoletos (USJ-R) nisalmot usab sa Miss World Philippines. Wala tuod niya nakuha ang korona, apan nalakip siya sa top 12 ug nakuha pod niya ang Miss Talent ug ang Miss Friendship awards. Ang taga Toledo nga si Richelle Theres Borja nakadughit sab sa Miss Sheridan award.

Adtong Mayo, ang crowd-favorite nga si Donna Maricel Cardino maoy napiling Miss Mandaue 2011. Nisalmot pod siya sa Miss World, apan napakyas pagsulod sa top 12 spots.

Niadtong Enero sa Pacific Grand Ballroom sa Cebu City Waterfront Hotel and Casino, usa ka Mass Communication student ang nakoronahan isip Miss Cebu 2011 – si Mia Ali Faridoon sa University of the Philippines (UP)-Cebu.

Ang winning answer sa 19-anyos nga Filipina-Bahrinian beauty sa pangutanang “In what way as a Cebuana can you help in the aspect of nation-building?” maoy nakapadaog kang Mia. Suma pa niya: “As a mass communication student, I learned that the most effective communication tool is through word of mouth. I will use my knowledge and my recognition to spread the word, sticking to my values and confidence in helping build a stronger nation.”

Gawas sa titulo, si Mia pod ang napili isip Kapamilya Star of the Night. Nakuha pod niya ang P60, 000 cash, roundtrip ticket to Las Vegas ug Hong Kong.

Karung Enero 12, lain na sab nga Cebuana ang modughit sa koronang gihuptan ni Mia ug mao na pud ang mamahimong instrumento sa pagpalambo sa natad sa turismo dinhi sa Queen City of the South.

Unta sa pagsulod sa tuig 2012, magmabungahon gihapon ang Pilipinas pinaagi sa pagpadala gihapon og mga maayong representante ngadto sa mga international pageants nga maghatag na pud og garbo sa atong nasud.