Blouse ni Kris, gowns nina Regine at Lorna isusubasta!

MANILA, Philippines - Ngayong panahon ng Kapaskuhan, ibinabalik ng Kapuso Foundation (KF) ang Ogie & Regine’s Celebrity Ukay-Ukay, isang 10-day Christmas sale ng mga pre-loved items ng iba’t ibang mga Kapuso stars simula December 9 hanggang December 18 sa Noel Discovery Bazaar sa PICC Forum Tent.

Dadalo sa opening ceremony ang mga naglalakihang Kapuso celebrities na pangungunahan nina singer-songwriter Ogie Alcasid, R&B Prince JayR, at Kapuso Tweens na sina Louise delos Reyes, Bea Binene at Derrick Monasterio.

Makikisaya rin sa bazaar sina Ms. World First Princess Gwendoline Ruias, Aljur Abrenica, Katrina Halili, Frencheska Farr, primetime princesses Mona Louise Rey, Barbara Miguel at Kylie Ocampo ng Munting Heredera, Survivor Philippines Season 4 castaways na sina Maey at Betong, Carlo Gonzales, Arthur Solinap, Chuckie Dreyfuss, Isabel Granada, Stef Prescott, Gino dela Peña, Protégé contenders, at marami pang iba.

Ilan lamang sa mga pre-loved items na live ipapasubasta ang asul na blouse ni Kris Aquino, mga gown nina Regine Velasquez at Lorna Tolentino, cocktail dress ni Bianca King, at ilang mga sapatos ni Luanne Dy.

Ito ang huling fund drive ng KF ngayong taon para sa Kapuso School Development (KSD), isang proyektong naglalayong tugunan ang kakulangan ng mga maayos at komportableng silid-aralan sa bansa na ayon sa Department of Education (DedEd) ay umabot na sa 114,000.

Simula 2003 ay nakapagpatayo na ang Foundation ng halos 300 classrooms. Noong 2009 lamang, 89 na classroom ang kanilang itinayo at ipinagawa matapos ang pananalanta ng bagyong Ondoy at Pepeng. Nais din ng KSD na isulong ang pagiging maka-kalikasan ng mga mag-aaral sa pamamagitan ng tree planting activities.

Ngayong 2011, humigit-kumulang na P4.8 million na ang nakalap ng Kapuso Foundation para lamang sa KSD. Kamakailan ay nabiyayaan ng isang three-classroom building ang Adiangao High School sa San Jose , Camarines Sur na isa sa pinaka-huling naging beneficiary ng year-long project na ito.

Inaanyayahan ang lahat na pumunta at mag-shopping sa Ogie & Regine’s Celebrity Ukay-Ukay sa Noel Discovery Bazaar sa PICC Forum Tent simula December 9 hanggang December 18. Bukas ang bazaar mula 11 AM hanggang 9 PM mula Lunes hanggang Biyernes, at 11 AM hanggang 10 PM tuwing Sabado at Linggo.