Hudyaka sa Kawayan Festival

Merry Christmas kanatong tanan mga Ka Tribung BisChikadora!!!!, pila nalang ka adlaw pagmata nato Pasko na diay. Usa sa mga tips sa inyong Yur's truly, ayaw kalimot sa inyong mga listahan sa mga pamaliton para dili ka ma stress ug imong matagaan og oras ang tanan. Niaging semana, napuno ko sa stress pero dawaton ang tanang stress human ipahiyom kay kung imo kining paundayongan, ikaw ang mag-antos niini. Ana lang!!!

Mao nga malipayon kaayo ko kay nawala ang akong stress sa imbitasyon sa akong amiga nga si Eric Ybas nga maoy Tourism Officer sa Lungsod sa Alegria, Cebu para mamahimong usa sa mga hurado sa ilang ika-unom nga Kawayan Festival, pagkahuman sa BuenaMano Balita nisutoy dayon ang akong beauty sa Cebu South Bus Terminal para didto manukad. Tuod man, nigikan ang aircon bus alas diyes sa buntag ug tupad nako sa akong gilingkuran ang usa ka maanyag nga Koreana.              Nalingaw ko sa ilang grupo kay andam kaayo sila sa ilang adtoan nga destinasyon, gikan sa tubig, ilimnon nga makahubog ug mga nagkadaiyang mga pagkaon. Nakaingon ko nga best in budgeting gyud ang ilang dating. Nanaug ang mga langyaw sa Lungsod sa Moalboal ug nanakay og tricycle padulong sa usa sa mga resort sa nahisgutang lungsod. Ana lang!

Pag-abot nako sa Lungsod sa Alegria,Cebu nidiretso dayon ko sa opisina sa mayor kauban si Ms. Trining Bubuli  nga taga Toledo City. Nagsakay man diay mi sa bus ni Ms. Bubuli ,wala ko kabantay  kay best in sleeping beauty man ko niadtong higayona, hahahhaha!

Tungod kay gigutom na pud ko kay ala una sa hapon ko naabot sa Lungsod sa Alegria, lafang kung lafang ang mugna sa inyong BisChikadora.

Pagkahuman, ang mga hurado didto mi sa Tourism Office nagpaabot ug take note didto nimo makita ang usa ka exhibit nga nag-ulohan og  " Opening of the Eyes on Alegria 2011 Photo Expo featuring the photos of Boboi Costas (sir Boboi excited na ko mo-experience sa organic food sa Aloguinsan, Cebu )  .Pagkahuman sa Street Dancing, ang Ritual Showdown dayon ang isunod nga infairness napuno ang Municipal Plaza Square, Poblacion.

Gisugdan kini sa usa ka Doxology kauban ang Saint Francis School of Alegria Rondalla, usa ka init nga pagdawat sa mga bisita ni Mayor Emelita B. Guisadio, gisundan sa MPDC Jesus Rey S. Cavalida para sa rationale sa maong festival. Adunay upat ka pundok nga nagtigi sa maong indigay nga naglangkob sa pundok Lawiswis - Legaspi Elementary School, Pundok Dabong- Madridejos Elementary School, Pundok Guod- Sta. Filomena Elementary School ug ang pundok Kagingking- Alegria Central School.

Performance level gyud ang mga chikiting mao nga kaming mga hurado sobra ka lingaw ug nabilib ko sa suporta nga gihatag sa ilang mga ginikanan, maestra ug mga ka barangay nga todo bigay gyud sa ilang abiba. Mao kini ang listahan sa mga nakadaug sa bag-ohay lang nga Kawayan Festival 2011:

Best in Andas - Pundok Dabong - Madridejos Elementary School

Best in Audio Van - Pundok Guod - Sta. Filomena Elementary School

Best in Street Dancing - Pundok Kagingking - Alegria Central School

Ritual Showdown : 

4th place - Pundok Lawiswis - Legaspi Elementary School

3rd place - Pundok Kagingking - Alegria Central School

2nd place - Pundok Dabong - Madridejos Elementary School

1st place - Pundok Guod - Sta. Filomena Elementary School

BisChika pa ni Marti Ybañez, ang chairman sa mga hurado nga " nindot ang theme  ug concept sa Pundok Guod , nindot ang music, props ug dance  vocabulary ug ang importante sa tanan napakita nila ang ilang identity ug ang espesyal sa ilang lungsod"  mo-bow na gyud ko nimo Marti..bow! ug ang host dili  basta-basta ang banggiitang James Solomon " Humba " Gallarde. Nihatag usab og usa ka mensahe nga puno sa inspirasyon ang Regional Director Hon. Rowena Lu Y. Montecillo. Human sa awarding sa mga mananaug, gitapos ang maong pasundayag ni Hon. Maria Letecia P. Donayre.

Hangtud sa sunod na pud nga Kawayan Festival Que Alegre Que Alegria!!!!