Georgina sa ANTM

CEBU, Philippines - Mulugwa ang beauty ni Georgina Wilson sa America’s Next Top Model ni Tyra Banks dili isip contestant, kundili isip model/stylist. Siya maoy mihatag og advice sa mga kandidata sa usa ka episode diin Bench underwear ang sponsor. Sa Greece gihimo ang maong episode diin November 9 kini ipakita sa Amerika ug November 14 sa Pilipinas.

KC mukanta sa SEA Games

Tua na sa Indonesia si KC Concepcion sanglit napili siya nga lakip sa mukanta atol sa grand opening sa SEA Games ugma puhon. Makauban niya ang duha pa ka mga babaye nga Asian performers pud.

Sam mubalhin sa Amerika

Sugod sa February 2012, adto usa sa Amerika magbasi si Sam Milby alang sa iyang umaabot nga TV shows para sa usa ka dako nga network. Suma pa ni Sam nga positibo ang iyang meeting sa network bosses sa New York ning bag-o lang, ug muistar siya sa Amerika sulod sa tulo ka buwan.

Dili na mahinayon ang movie

Apan gumikan sa maong kalambuan, dili na matud pa siya malakip sa umaabot nga teleserye sa ABS-CBN, ang ‘Alta” nila ni Angelica Panganiban, KC Concepcion ug Gretchen Barreto. Dili pud niya mahimo ang movie unta nila ni Bea Alonzo.

“Leya” si Jasmine

Duha na lang ka semana ang nahabilin alang sa action-serye sa TV5 nga Ang Utol Kong Hoodlum starring JC de Vera ug Jasmine Curtis-Smith. Ang remake sa TV series sa APT Entertainment, Leya ang sunod nga project ni Jasmine sa Kapatid network. Si Nadine ang unang bida sa Leya kaniadto sa GMA-7.

Walay kumpetinsya

Gisalikway ni Anne Curtis ang kumpetisyon tali niya ug ni Vice Ganda karon nga gikatahong naapsan na sa Praybeyt Benjamin ang total gross sa No Other Woman. Suma pa ni Anne, sisters matud pa sila ni Vice busa kalipay nila ang kalampusan sa usa’g-usa.

Snooky dili na magpasaway

Karon nga subli siyang gihatagan og kahigayonan sa ABS-CBN nga makabalik sa telebisyon o sa showbiz human usab sa iyang pagkahanaw tungod sa pagkapasaway, misaad si Snooky Serna nga magtarong na gyud sa iyang trabaho.

Lakip siya sa teleserye nga “Angelito: Batang Ama, starring JM de Guzman nga magsugod na karong Lunes sa hapon, diin problemado nga inahan ang iyang role nga matud pa niya susama sa iyang tinuod nga kinabuhi.

Siya maoy inahan ni Charee Pineda niining maong serye. Si Charee maoy mapamabdosan ni JM.

Nasayran nga upat ka tuig nga nahanaw si Snooky sa ABS-CBN, diin katapusan niyang proyekto mao ang Marina nga gibituonan ni Claudine Barreto kaniadto.

Aminado si Snooky nga siya ra pud maoy hinungdan nganong kalit nga namugnaw ang iyang career kaniadto, busa misaad siya nga dili na gyud usikan kining kahigayonan nga gihatag kaniya sa abs-cbn.

"Ipinapangako ko naman this time na unti-unti ay babaguhin ko na yung mga mali kong nagawa before.

 "Kasi, alam ko talaga na andaming nagalit, nainis, at may mga nakatrabaho ako na marinig pa lang ang pangalan ko ay naiirita na sila,” nagkanayon si Snooky.

Labihan ang kalipay ni Snooky gumikan kay gidungog matud pa sa Ginoo ang iyang mga pag-ampo nga makabalik sa showbiz.

Wa magdinaga

Suma pa ni Barbie Forteza nga wala matud pa siya magdali nga madalaga.

Kini taliwala sa mga pagsaway sa uban nga matud pa, 14 anyos pa gani si Barbie apan daw nagdali na siya nga madaga.

Hinungdan nga sa interview sa PEP kaniya, misupak ang dalagita sa maong obserbasyon sanglit sa una matud pa nga nag-regular school pa lang siya, ang iyang mga classmates mature na matud pa og paminaw sa ilang kaugalingon gumikan kay duna na kini mga uyab.

Apan siya hangtud karon, wala pa gyud mag-uyab-uyab sanglit alang niya, dili pa siya angay musulod niining butanga.

Suma pa ni Barbie nga magduwa pa gani siya og Chinese garter ug jackstone sanglit bata pa man siya. Ang problema lang karon niya pa kay wala na siyay panahon aron magduwa sa gusto niyang duwaon. (BANAT NEWS)