Sunshine wala mo-renew sa GMA

CEBU, Philippines - Wala mo-renew si Sunshine Dizon sa iyang kontrata sa GMA-7 sukad pa niadtong Agosto busa misamot ang mga hungihong nga mobalhin ang aktres sa TV 5 ug giingong duna na’y nahitabo nga sabot-sabot tali sa kampo sa aktes ug sa mga kadagkoan sa maong network.

Iya ug Drew magpakasal na

Dul-an na sa pito ka tuig ang relasyon nila ni Iya Villania ug Drew Arellano busa nahisgutan na nila ang planong pagpakasal apan dili pa matino sa duha ang partikular nga petsa niini.

Mickey ug Iwa nag-abot

Nagkaabot ang kanhi mag-uyab nga sila si Iwa Moto ug Mickey Ablan sa usa ka resto bar sa kaulohan hinungdan nga nag-away na pud ang duha apan nauwang ra dayon kini sa ilang mga higala.

Mother Lily midepensa kang Lloydie

Suma pa ni Mother Lily Monteverde nga buotan si John Lloyd Cruz busa wala pa siya makumbinser sa report nga usa ka palahubog nga pagkatawo ang aktor nga una na nga gibutyag kaniadto ni Ruffa Guttierez.

Naapektohan sa isyu

Tsika pa ni Ynna Asistio nga naapektohan pag-ayo ang iyang amahan ug usahay na lang kini mokaon gumikan sa kaguol sa panagbikil karon sa iyang inahan nga si Nadia Montenegro ug sa talent manager nga si Annabelle Rama.

Joint forces

Nagtinabangay na karon ang National Bureau of Investigation ug Department of Justice aron makabalik dinhi sa nasud ang suspek sa pagpatay kang Ramgen nga si Ramona.

Adbokasiya ni Cesar

Usa si Cesar Montano sa mga artista nga misalmot sa kampanya batok sa panigarilyo ug gisaysay niini nga dili angayan sudlan ang maong bisyo aron malikayan ang mga sakit sa kalawasan.

Nameligro kanunay

Kanunay nga mahimutang sa bottom line ang alaga ni Aiza Seguerra nga si Krizza Nikka matag elimination night sa Protégé.

Kigoy gisaway

Gisaway pag-ayo sa nagkadaiyang online forum ang kasamtangang housemate sa Pinoy Big Brother Unlimited nga si Kigoy gumikan kay kanunay ipakita niini ang iyang pagka-hambugero sulod sa Balay ni Kuya.

Child wonders mopatim-aw karong Nob. 14

Usa ka Christmas special nga serye ang magsugod na karong Nobyembre 14 sa gabii sa ABS-CBN.

Kini nag-ulohan og “Ikaw ay Pag-ibig,” kung diin bida ang giila nga child wonders sa Philippine television nga sila si Zaijian Jaranilla, Xyriel Manabat, Mutya Orquia ug Louise Abuel.

Mao kini ang unang higayon nga nag-uban sa usa ka proyekto ang nahisgutang mga bata nga aktor ug aktres.

Ipakita sa maong serye ang hiyas nga makuha kung mopatigababaw ang paghigugmaay sa mga tawo ug masayran usab ang tinuoray nga kahulogan sa Pasko.

Malakip usab sa maong serye sila si Dimples Romana, Alfred Vargas, Paulo Avelino, Yen Santos, Bembol Roco ,Mark Gil ug ubos kini sa direksyon ni Erick Salud.

Naglakip usab sa listahan sa “Ikaw ay Pag-ibig” ang bag-ong Kapamilya child stars nga sila si Izzy Canillo ug Gerald Pisigan. (Sanden J. Anadia)

Regine nanganak na!

Usa ka himsog nga batang lalaki ang gihimugso sa Asia's Songbird nga si Regine Velasquez sa alas 7:47 niadtong Martes sa gabii. Ginganlan nila ni Regine ug sa iyang bana nga si Ogie Alcasid og Nathaniel James ang una nila nga anak.

"At 7:47pm nov 8,2011. God gave us Nathaniel James. Thank you for the prayers. God bless you all!,” mensahe pa ni Ogie nga iyang gi-post sa iyang Twitter account pipila ka minutes human nanganak si Regine.

Nagkanayon si Ogie sakto gyud nga siyam ka buwan nga nagsabak si Regine .Suma pa sa report sa Yahoo Philippines OMG! nga gihimugso ni Regine ang iyang anak pinaagi sa caesarian section.

"Songbird is now on her 36week (9months) of pregnancy, which means the pregnancy has completed its full term,” matud pa ni Ogie.

Dugang pa niya nga “gift of God” ang kahulugan sa Nathaniel busa mao kini ang napilian nila ni Regine nga ipangalan sa ilang anak.

Gusto ni Ogie nga mahimong relihiyoso si Nathaniel inigkadako niini aron mahimo kini nga responsabling indibidwal.

Mao kini ang unang anak nga lalaki ni Ogie sanglit puro man babaye ang duha niya ka anak sa kanhi niya asawa nga si Michelle Van Eimeren.

Si Regine ug Ogie gikasal niadtong December 22, 2010 sa Nasugbu, Batangas. (BANAT NEWS)