Sarah L. rumampang walang bra

Kuwento ng dumalo sa launching ng Profiles Magazine at GMA Ball ng GMA Artist Center, kinabog ni Sarah Lahbati ang ibang female GMAAC talents sa suot at impact. Agaw-eksena at seksing-seksi raw ang Kokak star sa suot na green gown na backless na, braless pa at hindi rin gumamit ng niplets.

Backless kung backless at braless kung braless si Sarah that night, kaya raw hindi lumapit ang ibang female talents ng GMAAC dahil lalo silang hindi mapapansin. Bale ba, maganda pa ang ayos ng buhok ng dalaga, kaya pagpasok pa lang ng Rizal Ballroom, pinagtinginan na.

Kahit si Derrick Monasterio na admirer ni Sarah at balak sanang manligaw, sobrang humanga sa dalaga.

Stef natuklaw ng cobra

Ipinakita ni Stef Prescott sa press ang marka ng kagat ng Philippine cobra sa kanyang left leg habang nasa Survivor Philippines Celebrity Doubles Showdown siya. Malinaw pa ang marka ng fangs ng cobra at medyo malayo ang agwat ng fangs, ibig sabihin, malaking ahas ang kumagat sa kanya.

Dinala si Stef sa Makati Medical Center sakay ng private plane at dito siya lalong humanga sa production team ng Survivor Philippines dahil handa at private plane pa ang sinakyan niya. Natutulog daw siya at posibleng tumabi ang cobra, naipit niya, kaya siya kinagat. Pero hindi pa rin siya nag-quit, bumalik sa San Vicente, Palawan at ipinagpatuloy ang challenges.

Bikini lang ang suot ni Stef sa island at minsan, nakatapis siya at “yes” ang sagot kung sasali pa rin siya sa Survivor kung saka-sakali. In fact, sinabi na niya sa staff na isali siya sa next season dahil kahit nahirapan, ang dami niyang natutunan. Si Gino dela Peña ang partner ni Stef.

Yellow Cab pizza ang unang kinain ni Stef pagbalik from Palawan at suwerte siyang three inches lang ang nawala. Suportado ng BF niyang si Benz Pacia (StarStruck 1 or 2 yata) ang pagsali niya sa SPCDS.

Ynna ayaw pakawalan ni Mark

Apat na eksena lang si Ynna Asistio sa The Road.

Pero may impact ‘yung scene na magkasama sila ni Renz Valerio sa cabinet at isa sa kanila’y patay na. Kung sino sa kanilang dalawa, malalaman ninyo ‘pag pinanood ang movie ni Direk Yam Laranas na opening sa November 30.

Samantala, itinanggi ni Ynna na break na sila ni Mark Herras, hindi lang sila nagkikita’t pareho silang busy, pero sila ang magka-date sa GMA Ball. Hindi raw pumayag si Mark na hindi sila magkasama sa table dahil nangakong ‘di siya iiwan.

Alden at TJ naging magkamukha

 Isa pang pinuri sa The Road ay si Renz Valerio dahil magaling sa kanyang mga eksena. Four to five days naman siyang nag-shooting, pero bago mag-shooting, dumaan sila ni Ynna Asistio ng two days workshop kay Direk Yam Laranas. 

First movie ito ni Renz kay Direk Yam na hands-on director daw at maga­ling mag-motivate. Nagulat din daw ang director dahil magkakamukha sila nina Alden Richards at TJ Trinidad.