Charice nag-sorry sa iyang papa

CEBU, Philippines - Nangayo og pasaylo si Charice ngadto sa iyang amahan nga si Ricky Pempengco nga dili niya matuman ang pangandoy niini alang niya nga magsundawo.

Matud ni Charice kuwang matud pa siya sa height, apan mamahimo gihapon siya nga magpaka sundawo pinaagi sa pagmaisugon, sanglit ingon niini man ang pagkaila kaniya sa gipatay niyang amahan.

Kahinumduman nga gidunggab patay sa gipangita na karon nga si Angel Capili Jr. ang amahan ni Charice didto sa Cabuyao,Laguna adtong Lunes sa gabii gumikan sa panaglalis. Apan matud pa, daan na nga may panagbangi ang duruha adtong 2005.

Mikabat na ngadto sa P200, 000 ang ganti nga salapi alang sa makatudlo sa nahimutangan ni Capili nga muresulta sa pagkasikop niini.

Samtang human sa sunod-sunod nga hait ug masuk-anong mga tweets ni Charice adtong Lunes, human usab namahayag ang igsuon sa iyang amahan nga hayan malipayon na ang pamilya sa singer karon nga patay na si Ricky, nahusay na silang tanan. Kini human matud pa sila nagka-istorya nga mao usay nakapahukom kang Charice aron tangtangon ang tanan niyang tweets.

Dungan niini, mipadangat sa ilang pahasubo ang pipila ka mga kaubanan ni Charice sa US hit musical series Glee sa pagbangutan karon sa Pinay international singing sensation.

Ang bida sa Glee nga si Lea Michele nagkanayon nga nag-ampo siya alang kang Charice ug sa pamilya niini. “My thoughts and prayers go out today to my girl @OfficialCharice and her family for their terrible loss.. Thinking of you Charice..” nagkanayon si Michelle sa iyang Twitter adtong Lunes sa gabii.

Ang uban pang international celebrities nga mipadangat sa ilang pahasubo mao sila si JoJo Wright, Thiia Megia, ug Drew Ryan Scott.

Ang Associated Press ug mga dagkong news organizations sa US padayong nagsunod sa mga panghitabo sa kamatayon sa amahan ni Charice.