Ikaw na gyud Scotty!

CEBU, Philippines - Ang American Idol champion nga si Scotty McCreery maoy gikonsiderar nga nakaangkon og dakong kalampusan kumpara sa tanan nga mga nangagi nga mananaug sa maong talent show sulod sa walo na ka uig.

Nasayran nga nagsagunson karon ang kakusog sa debut country album ni Scotty sa Billboard charts.

Siya maoy pinakabatang male artist kung diin ang debut album niini nahimutang dayon sa number 1 spot.

Ang album niya nga "Clear As Day" misidlak dayon sa unang semana nga pag-release niini.

Kahinumduman nga misikat si Scotty human siya midaog sa American Idol niadtong Mayo gumikan sa hanas niya nga pagkanta partikular na sa mga country music.

Ang "Clear As Day" gi-release sa Universal Music Group ug matud pa sa Nielsen SoundScan, nahalinan kini og 197,000 ka kopya sulod lang sa unang semana.

Aminado hinuon ang singer nga bisan kinsa nga singer, ganahan gyud mahimong numero uno apan iyang giangkon nga wala siya nagdahom nga didto kini napunta kaniya.

Ruffa ug Gabby magpares og balik

Gigaling na sa Regal Films ang reunion movie nila ni Ruffa Gutierrez ug Gabby Concepcion ubos sa direksyon ni direk Joel Lamangan. Kini mao ang Ded Na Ded Sa U. Kahinumduman nga nagpares kaniadto sila si Gabby ug Ruffa sa pelikulang “Loreta” sa wala pa mibuto ang 1994 MMFF scandal.

Miangkon na gyud

Gikumpirmar nila ni Zanjoe Marudo ug Bea Alonzo nga unom na ka buwan ang ilang relasyon. Ang duha gitakdang mobakasyon sa Korea sulod karong buwana.

Venus pasidunggan sa Gawad Amerika

Ang beauty Queen nga si Venus Raj maoy pasidunggan isip Woman of the Year sa 10th Annual Gawad Amerika. Ang awards night mahitabo karong Nobyembre 5 didto sa Celebrity Center sa Hollywood ,California.

Kapamilya na si Carmina

Gikatahong sa ABS-CBN mobalhin si Carmina Villaroel ug dili sa TV 5. Kahinumduman nga napatik dinhi sa Banat Hugyaw kagahapon nga mobiya na si Carmina sa GMA-7 ug aduna na’y negosasyon ang gihimo kalabot niini.

Kyla sikat sa Youtube

Gisumsuman na usab karon sa Youtube ang video sa production number ni Kyla sa Party Pilipinas kung diin gikanta niini ang Rocketeer.

Kapares ni Kyla sa maong production number ang RNB prince nga si Jay-R.

Rain moserbisyo sa militar

Mopaubos na sa walo ka semana nga training ang Korean pop star nga si Rain alang sa iyang military service nga mandatory sa ilang nasud. Human sa maong traning, moserbisyo dayon siya sa military sulod sa 22 ka buwan.

Absent sa birthday

Dili makatambong si Richard Guttierez sa birthday party sa iyang inahan nga si Annabelle Rama sa katapusang bahin karong buwana. Matud pa nga busy kaayo ang aktor karong panahona gumikan sa taping sa Survivor Philippines : Season 4.

Taping wala pa nahuman

Matud pa nga matapos na karong Nobyembre 4 ang mini-serye sa TV 5 nga Sa Ngalan ng Ina apan daghan pa nga mga buhatonon nga eksena niini . Nasayran nga padayon nga mipahuway sa taping si Nora Aunor gumikan sa overfatigue.

KC giimbitar ni Clinton

 Imbitado si KC Concepcion alang sa usa ka selebrasyon sa birthday ni kanhi US president Bill Clinton karong October 15 nga himoon sa Hollywood Bowl. Si KC kuyogan sa iyang mama nga si Sharon Cuneta.

Regalo alang kang Shalani

Nakapalit na og balay si Kongresista Roman Romulo sa Pasig. Suma pa niya nga mao kini ang puy-an nila ni Shalani Soledad inigkahuman sa ilang kasal sunod tuig.