Here Comes The "Queen"

CEBU, Philippines - Upat ka mga comebacking beauties ang lakip sa 20 ka mga kandidata nga magtigi alang sa Queen: Pageant for Alternatives sa Waterfront Cebu City Hotel & Casino karong November 5.

Buot pasabot, silang upat nakaapil na sa maong beauty pageant, nga nagpangidaron na karon og tulo ka tuig, apan wala palara sa ilang unang salga. Sila mao si Misses Egypt, India, Russia, ug Mexico.

Apan wala ni magpasabot nga sayon ra ang dalan nila alang sa kadaugan sa giisip nga labing prestihiyoso nga indigay sa kaanyag sa kasaysayan sa gay beauty pageant sa Pilipinas, sanglit dili kabintahaan ang ubang mga kandidata.

Pun-an pa, nga silang 20 ka mga kandidata, puros nanganti nga langkaton gayud ang korona kutob sa ilang ikabuga, gumikan kay nakauyon kaayo sila sa adbokasiya sa maong indigay nga mao ang pagpalig-on sa katungod sa kabayotan ug makab-ot ang kaangayan para sa tanan, bisan unsa pay seksualidad.

Ang “Queen” kansang coronation night, giingong mas hugyaw pa itandi sa Bb. Pilipinas, gisugdan niadtong 2009, isip proyekto sa Clothes for Life Foundation, Inc., ang pundok nga maoy nagsabak sa tanang designers, stylists, make-up artists ug clothing manufacturers sa Sugbo.

Ang sikat nga mga designers nga sila si Cary Santiago ug Wendell Quisido maoy naglingkod isip chairperson ug vice chairperson sa tinuig na nga indigay, kansang unang tuyo ug tumong mao nga magkahiusa ang mga kabayotan sa Sugbo aron mas lig-on ang pagpanlimbasog sa ilang mga katungod.

Sa samang higayon, matinud-anong naglihok ang tanang tipik sa maong indigay sa pagtunol og hinabang ngadto sa mga nanginahanglan pinaagi sa nagkadaiyang charitable institutions sama sa Sto. Niño Children’s Center sa Catarman Liloan, Seven Sisters House of Mercy Home for the Elderly sa Talisay, Our Lady of Divine Grace Orphanage sa Simala, Sibonga, ug Little Lamb Children’s Center isip beneficiaries.

 Sa kasaysayan sa Queen, kanunay usab nga giatngan kinsa nga mga inila sa katilingban ang mulingkod isip hurado. Pagsugod adtong 2009, chairperson sa mga hurado ang naila na kaayong socialite ug philanthropist nga si Amparito Llamas Lhuillier, ug gisundan sa sikat nga designer nga si Marguerite Jones Lhuillier sa milabay nga tuig. Lakip sa mga milingkod na isip hurado sila si furniture designer Kenneth Cobonpue, former Miss Universe Margie Moran-Floirendo, gay rights activist Rica Paras, Preview fashion editor Daryl Chang ug model Marina Benipayo.

Karong tuiga, giplanohan sa mga organizers nga imbitahon sila si Queen of All Media Kris Aquino ug King of Talk Boy Abunda isip mga hurado, apan dili pa kumpirmado. Sama sa milabay nga duha na ka mga pageants, ang “Talk Icon” sa Sugbo nga si Jude Bacalso maoy mu-host,

Gikatahong kapin sa 100 ang naglaom nga mahimong kandidata sa maong pageant, apan human sa makuti nga paghashas, 21 lang ang nakalusot. Apan ang usa ka kandidata milarga na sa gawas sa nasud ug uwahi na aron pagkuha og hulip niya, hinungdan nga 20 ra gyud ang magtigi sunod buwan.

Atol sa press presentation adtong Biyernes sa hapon diha sa Diamond Hotel, nasayran nga usa sa mga requirements mao nga kinahanglang wala pa mupailawom og “sex transplant” ang kandidata. Hinuon aprobado ang cosmetic enchancement.

Nasayran usab nga dili basta-basta ang educational background sa tanang kandidata sanglit adunay anthropologist, psychologist, registered nurse, designers ug magtutudlo...