Marie mibisita sa Sugbo

CEBU, Philippines - Kasamtangang gi-promote ni Marie  Digby dinhi sa Sugbo  ang iyang album nga “Your Love” nga gilangkoban sa sikat niya nga mga awit sama sa  Swoon,   I Think I’m in Love,  Loving You is Easy,  I Do, Say It Again, Umbrella ug Your Love.

Nakauban usab niya sa pipila niya ka mga kanta sila si Jericho Rosales ug Sam Milby.

Personal gyud nga miduaw sa 93.9 I FM  ang international artist nga si Marie sa milabay nga gabii sa timeslot nila ni  DJ Radcliffe ug Rhoxy G.

Gisaysay ni Marie ngadto kang DJ Radcliffe nga ikaduha na kini nga higayon nga mitikang siya dinhi sa Pilipinas.

Gikatahong sa Tagaytay City misuroy si Marie niadtong Mayo uban sa iyang pamilya alang sa todo nga summer vacation.

Nasayran nga gisumsuman na usab karon ang mga video nga iyang  gipang-upload sa Youtube , kung diin  gihimoan niya og acoustic version ang awit nga What I’ve Done sa Linkin Park, Rocketeer sa Far East Movement , On The Floor ni Jenifer Lopez ug Sweet Dreams ni Beyonce. (Sanden J. Anadia)

Klaro sa pattern

Gikatahong tataw na kaayo sa usa’g-usa ang sweetness nila Bianca King ug Dennis Trillo sukad sila nagkauban sa seryeng Sinner or Saint ug giingong nakit-an ang duha nga nag-holding hands.

Wanted pundo

Moabot ngadto sa P30 million ang gikinahanglan alang sa kampanya sa pelikulang Ang Babae sa Septic Tank , ang official entry sa Pilipinas alang sa Best Foreign Language Film category sa 2011 Oscar Awards.

Naglikay nga maunhan

Wala una tugti ang mga media ug mga fans ni Nora Aunor nga moduaw sa set sa seryeng Sa Ngalan ng Ina sa TV 5 aron dili mokatag og una ang istorya sa nagkadaiyang eksena niini.

Charice nag-concert sa Qatar

Nagmalampuson ang solo concert ni Charice Pempengco dili pa lang dugay didto sa Qatar nga gitambongan sa daghan nga mga Pinoy nga nagbase sa maong nasud.

Futbolilits gilubong ni Maria

Nakakuha og dakong national TV rating ang Maria la del Barrio sa ABS-CBN niadtong September 27, kung diin nakatala kini og 20%,samtang ang kaatbang niini nga ‘Futbolilits’ nakakuha og 10.2%.

Christopher naluwas

Mapasalamaton si Christopher de Leon sa ABS-CBN gumikan kay dili pareho ang timeslot sa seryeng Padre de Pamilya ug ang programa sa TV 5 nga Sa Ngalan ng Ina. Parehong nalakip si Christopher sa nahisgutang mga serye.

Lorna namarayeg og proyekto

Matud pa nga mihangyo karon si Lorna Tolentino ngadto kang Senador Bong Revilla nga ipaayo ang usa ka dalan sa Cavite nga nagpaingon sa iyang farm. Usa si Lorna sa cast sa umaabot nga pelikula sa senador sa Metro Manila Film festival 2011 nga Panday 2

Garbo sa Pinoy

Ang mga indie film nga Patikul ug Maskara maoy pipila sa malantawan sa 12th Asiatica Film Mediale Festival nga himoon sa Rome, Italy karong October 12 ngadto sa 22.

Westlife gidumugan

Gidumugan pag-ayo ang concert sa Westlife niadtong Huwebes sa gabii sa Araneta Coliseum kung diin ang awit nga “Flying without Wings” maoy grand finale sa 18 ka mga kanta nga ilang gihalad sa ilang mga fans.

Mario naangkon sa Dos

Ang ABS-CBN maoy nakaangkon sa right alang sa exclusive coverage sa pag-abot sa Thai hearththrob nga si Mario Maurer dinhi sa Pilipinas karong October 28 ug tukion na usab sa dili madugay ang iyang movie project ubos sa Star Cinema.