Umamin nanay ni Angelica natutuwa kaya nag-aalaga ng tuko sa bahay
Ang gulu-gulo ng interbyu namin ni Joey de Leon sa mag-inang Beth at Angelica Jones sa Startalk kahapon.
Tungkol sa tuko ang isyu pero ang dami-daming sinabi ni Beth Jones kaya nalito-lito ako. Nakakaloka ang dialogue ni Beth na natuwa lang ito sa tuko kaya nag-alaga siya sa bahay nila.
Kahit bigyan ako ng sangkatutak na datung, never akong matutuwa at mag-aalaga sa tuko.
Tinalbugan din ako ni Angelica dahil ang dami-dami ng kanyang mga binati. Ang sey ni Angelica, tatapusin na niya ang isyu dahil lumalaki na ito.
Ang pagsasalita raw niya kahapon sa Startalk ang huling beses na magkokomento siya pero pinaiimbestigahan daw niya sa NBI ang isyu para malaman ang identity ng tao na nasa likod ng mga paninira sa kanya.
Pacman umiwas pag-usapan ang pulitika
Dumating na kahapon si Congressman Manny Pacquiao mula sa Amerika at dumiretso siya sa Sarangani province para sa live show ng Manny Many Prizes. Inabangan ng media ang pagdating ni Papa Manny dahil sa isyu na kakandidato siya sa pagka-gobernador sa susunod na eleksiyon at Bise Presidente ng Pilipinas ang target niya pagkatapos.
Iniwasan ni Papa Manny na sagutin ang pangungulit ng mga reporter tungkol sa kanyang political plans. Mas gusto raw niya na pag-usapan ang boksing at ang laban nila ni Juan Manuel Marquez kesa pulitika.
Instant big news ang balita na type ni Papa Manny na kumandidato bilang Vice-President dahil sa kanyang superstar status. I’m sure, nag-alala ang mga pulitiko na nagbabalak na maging next Vice-President of the Philippines dahil knows nila na mahirap kalaban ang Pambansang Kamao na kilalang-kilala sa apat na sulok ng Pilipinas.
Kampo nang ‘nabuntis’ ng ex ni iwa tahimik pa
Natsismis na buntis si Iwa Moto bago ito lumipad sa Japan pero napatuna-yan niya na walang katotohanan ang balita nang umapir siya sa FHM Sexiest Party sa World Trade Center.
May twist ang buntis issue dahil si Janna Dominguez naman ang napapabalita na buntis, courtesy of Mickey Ablan, ang ex-dyowa ni Iwa.
Tahimik pa ang kampo nina Janna at Mickey tungkol sa tsismis na malapit na silang maging father at mother.
Isabel at Gabs dedma kahit nagkakargahan sa harap ng camera
Hindi na talaga inililihim nina Isabel Oli at Gabs Valenciano ang kanilang relasyon. Dedma sila kesehodang nakunan ng TV camera ang pagkarga ni Gabs sa kanyang girlfriend nang dumalo sila sa baby shower ng mag-asawang Carlene Aguilar at Yo Ocampo.
Halata sa mga kilos nina Isabel at Gabs na magkasundung-magkasundo sila. Naipakilala na rin ni Gabs ang girlfriend niya sa kanyang mga magulang na sina Gary Valenciano at Angeli Pangilinan.
Mga showbiz personality din ang mga dating karelasyon nina Gabs at Isabel. Naging girlfriend ni Gabs si Rachelle Ann Go at ex naman ni Isabel si Paolo Contis na happily-married na kay Lian Paz.
Pag-Atake sa world trade center sampung taon na
Ginugunita ngayon sa buong mundo ang malagim na pag-atake ng mga terorista sa World Trade Center noong September 11, 2001. Sampung taon na ang nakalilipas mula nang gulantangin ang buong mundo ng shocking news na nangyari sa Amerika.
Hindi nagpahuli ang mga TV network sa Pilipinas. May TV special sila tungkol sa mga kaganapan noong September 11, 2011. Umaga sa Amerika nang maganap ang trahedya at gabi sa Pilipinas.
Mabilis na kumalat ang balita dahil sa CNN at uso na noon ang texting. May mga Pilipino na kinilala bilang mga bayani ng September 11 attack dahil sa pagtulong nila sa mga biktima ng gumuhong Twin Towers.
- Latest
