Naguol nga nalipay

CEBU, Philippines -  Naguol man sa pagbalhin ni Paulo Avelino sa ABS-CBN, nalipay na lang pud siya sa samang higayon tungod para man kini sa kaayohan sa iyang higala ug kumpare. Pero kung siyay pangutan-on wala sa iyang hunahuna nga mubalhin pud sanglit pinangga siya sa GMA-7.

Hinilakay

Mihilak si Maja Salvador atol sa one-on-one interview kagahapon human sa press con sa pelikulang “Thelma” kay wala siya mahimuot sa intriga nga giilog niya ang uyab ni Toni Gonzaga ug direktor niya nga si Paul Soriano.

Hununga na intawon

Dili apektado ang friendship nila ni Toni Gonzaga ug Maja Salvador sa pagkalambigit sa ngalan sa young actress ngadto sa uyab sa TV host nga si direk Paul Soriano. Matud ni Toni nga siya pa gani mismo ang mitag-an ngadto kang Paul nga sa dili pa isalida ang indie film nga “Thelma” diin bida si Maja, malambigit na silang duha sanglit si Paul man ang direktor niini.

Nagpasalamat

Nagpamisa pasalamat niadtong Martes sa gabii ang GMA-7 tungod sa kalampusan sa teleserye nga “Munting Heredera” nga permanenteng nag-una sa ratings game, ilabi na sa Mega Manila. Gumikan niini, extended og 10 weeks ang maong serye.

Single na si Akihiro

Nagbuwag na sila si Akihiro Sato ug ang iyang Brazilian girlfriend nga si Anaue Santos. Naa gihapon si Anaue sa Pilipinas pero wala na sila magtipon og balay. Ipunting na matud pa ni Akihiro ang iyang atensyon sa iyang showbiz career, gani mibalik na og nindot ANG lawas sa maong Survivor Philippines Celebrity grand winner.

Eugene na-starstruck ni Nora

Aminado si Eugene Domingo nga na-starstruck siya kang Superstar Nora Aunor sa first taping nila niini para sa mini-series sa TV5, “Sa Ngalan Ng Ina.” Pero niya pa upat ka minutos ra ang iyang pagka-starstruck ug sa kadugayan nakasabot siya nga ang superstar normal nga tawo ra pud dili gusto og gubot, gusto nga hapsay ug malipayon kanunay.

Jake nauyonan ni Gabby

Dakong boto si Gabby Eigenmann kang Jake Ejercito para sa iyang manghod nga si Andi. Matud ni Gabby, bisan pa man sa sitwasyon karon ni Andi wala gyud mubiya si Jake sa nagsabak nga dalaga, padayon kini nga nagsuporta. (BANAT)