ABS-CBN: "Cebu is very important to us"

CEBU, Philippines - “We are transparent. We are losing in the afternoon block but not naman in a very distant manner.” Kini maoy pag-angkon ni ABS-CBN Corporate Communication head Bong Osorio ngadto mga sakop sa Cebu Entertainment Group (E-Group) atol sa usa ka pakighimamat didto sa Manila niadtong Biyernes sa hapon.

Giangkon ni Osorio nga nagsugod gyud ang inanay nila nga pagkapildi sa panghapon nga ratings game sukad nawagtang ang Wowowee ni Willie Revillame, nga admitadong lig-on nga pre-program nga miganoy sa ubang mga salida pataas.

Gihimo niyang sanglitanan nga kusog gyud ang TV Patrol nationwide tungod kay ang programa nga Mula Sa Puso nga natapos niadtong Biyernes, taas man pud og rating.

Sa panghapon, padayon pa matud pa nga nakigbisog ang noontime show “Happy Yipee Yehey,”   sa ratings game diin, nagkataas na ang rating niini. Ang nahisgutang show gidumala nila ni Randy Santiago, Toni Gonzaga, Mariel Rodriguez, Pokwang, John Estrada ug uban pa.

Mapasigarbuhon nga gipahibawo ni Osorio nga kun perte pang paningkamot sa maong noontime show dinhi sa nasud, gihangop kini og maayo sa mga subscribers sa The Filipino Channel (TFC).

Dili usab matud pa angay kalimtan nga niadtong Pebrero pa lang nagsugod ang HYY busa normal lang nga dili gyud kini mudiretso pagka numero uno. Sa samang higayon, ang katigi niining Eat Bulaga, kapin na sa 30 ka tuig busa taas pa gyud kaayo sila og angay apson.

“We have 30 years to catch up. And it took Wowowee before, years to establish,” nagkanayon siya.

Pero kontrolado matud pa gihapon nila ang Cebu ug Davao sa ratings game sa hapon ug labaw na sa primetime.

“They (Davao and Cebu) are giving us good business so why claim Mega Manila only?,”nagkanayon si Osorio, isip pagsupak sa obserbasyon nga numero uno gihapon sila sa Sugbo, apan dili na ingon niana ka distansya sukwahi sa mga milabay nga katuigan diin dako pa kaayo sila og labaw.

“We are not resting on our laurels. Cebu is very important to us,” ni Osorio pa.

Giangkon niya nga naglisud gyud sila sa Mega Manila rating pero gumikan kini sa technical nga kakulian, diin duna pay mga bahin sa Luzon nga dili gyud maklaro ang ilang signal. Apan duna na matud pay mga lakang nga gimontar aron pagsulbad niini.

Giklaro ni Osorio nga dili kay ang Kantar Media TNS Rating ra maoy ilang basehanan sa ilang padayong pag-angkon nga ang ABS-CBN maoy tinuod nga number one sa tibuok Pilipinas, daghan pa matud niya sila og mga tinubdan nga mupalig-on niini.

Nakakat-on si Kim

“I learned to love my self more. I learned to be strong.” Kini maoy tubag ni Kim Chiu sa pangutana ni Boy Abunda atol sa The Buzz kagahapon kabahin sa unsay iyang nakat-onan human sa pangbuwag nila ni Gerald Anderson.

Gihangop si Donna

Trending kagahapon sa Twitter ang special guest appearance ni Donna Cruz sa Party Pilipinas.

Maxene best woman rapper

Gidayeg og maayo ang pag-rap ni Maxene Magalona kagahapon atol sa iyang pag-guest sa Showbiz Central. “Best woman rapper” matud pa ang anak ni anhing Francis M., suma pa sa mga nakakita ug nakauyon.

Mamuwa ang dughan

Nabantayan nga “common denominator” nila ni Toni Gonzaga, Bea Alonzo, ug Julia Montes ang “namumula ang dibdib” kung ma-tense. Mao ni na-obserbahan dihang mi-guest si Julia sa The Buzz kagahapon kauban sila si Enrique Gil, Sam Concepcion ug Kathryn Bernardo.

Hunongi na tawon

Subling gihimakak ni Rachelle Ann Go ang intriga tali nilang duha ni Cesar Montano kabahin sa ilang “sweetness” sa usag-usa didto sa Canada. Mihangyo siya nga hunungon na ang maong intriga sanglit naikog siya sa pamilya ni Cesar.

 “Pahiram ng Isang Ina”

 Karong hapon na magsugod ang “Pahiram ng Isang Ina” sa GMA-7 starring Bea Benene ug Jhake Vargas. Ang maong serye maoy hulip sa “Blusang Itim” diin makauban nila sila si   Maxene Magalona, Luis Alandy, Marco Alcaraz, Antonio Aquitania ug Carmina Villaroel.

Maria La del Barrio

Karong hapon pud sa dili pa ang TV Patrol magsugod ang Pinoy adaptation sa Mexican telenovela “Maria La del Barrio” starring Erich Gonzales ug Enchong Dee. Mao ni hulip sa “Mula Sa Puso” nga nag-number one sa trending topics sa Twitter atol sa finale niini niadtong Biyernes.