Superstar Nora August 2 muabot!

CEBU, Philippines - Sigurado na gyud matud pa nga muabot si Superstar Nora Aunor sa Pilipinas karong August 2, suma pa sa publicist ni Governor ER Ejercito nga si Jobert Sucaldito. Plansado na pud matud pa ang offers para sa pelikula nga “El Presidente” ug sa usa ka teleserye sa TV5.

Erich gibaraw ni Enchong!

August 15, hingpit nga makita sa primetime ang Pinoy version sa “Maria La del Barrio” sa ABS-CBN diin bida sila si Erich Gonzales ug Enchong Dee.

Mulungtad kini og unom ka buwan sa primetime.

Ang nahisgutang teleserye maoy muhulip sa Mula Sa Puso ni JM De Guzman, Enrique Gil ug Lauren Young nga makita sa telebisyon sa dili pa ang TV Patrol.

Sa presscon kagahapon, gibutyag ni Erich nga may sinabutan sila si Enchong nga dili mahigugma sa usa’g-usa samtang sila maoy magka loveteam.

“We made a promise talaga na hindi kami mai-inlove sa isa’t-isa,” nagkanayon si Erich.

Pero gibaraw siya ni Enchong pinaagi sa, “Dapat hindi ka nagsasalita ng tapos dahil hindi mo malalaman ang pwedeng mangyari bukas.”

Dungan niini, mapaabot matud pa ang daghang kissing scenes tali ni Erich ug Enchong niining maong teleserye.

Nangandam gyud matud pa si Enchong alang niining maong proyekto diin, nag-no rice diet gyud siya og pipila ka buwan aron hulma gyud ang abs sa iyang tiyan.

Samtang ang Maria La del Barrio maisip nga reunion sa pipila ka questors sa Star Circle Batch 2, sanglit apil pud niini sila si Aaron Villaflor ug Paw Diaz.

Naa pud sila si Angel Aquino, K Brosas ug Jake Roxas kinsa mipadayag nga malipayon siya karon nga sa ABS-CBN siya nagpasilong. Kahinumduman nga kanhi Kapuso si Jake.

Ikatulo na kining proyekto ni Jake sa ABS-CBN, ang unang duha mao ang Magkano Ang Iyong Dangal ug Imortal.

Sila si Richard Somes ug Rory Quintos ang mga director sa Maria La del Barrio.

Kris Bernal ang bida

Si Kris Bernal gyud diay bida sa danceserye sa GMA-7, ang Time of My Life nga magsugod na karong Lunes, August 1, sa primetime block.

Suma pa nga ang maong serye istorya sa kinabuhi ni Shane (Kris) kinsa nangandoy nga mamahimong sikat nga dancer. Sa iyang pagsubay sa dalan paingon sa kalampusan, may makaplagan siyang mga detalye sa iyang kinabuhi ug sa iyang kagahapon.

Aron pagtuman sa iyang pangandoy, duha ka mga lalaki nga mutabang niya ug makabaton og luna diha sa iyang kasingkasing—si Jason (Rocco Nacino) nga iyang childhood friend ug si Patrick (Mark Herras), higala ni Jason ug maoy nagtukod sa Motion Masters.

Sa Motion Masters makauban nila sila si Ryza Cenon isip Rochelle, Sarah Lahbati isip Pia, Sef Cadayona isip Harry, Mayton Eugenio isip Amera, Ken Chan isip Rudolph, Teejay Marquez isip Chicho, Renelee Asilum (Jump In grand winner) isip Cynthia.

Katigi sa ilang grupo ang The Elite Crew nga panguluhan ni Zaira (LJ Reyes) kauban sila si Steven Silva isip John, Enzo Pineda isip Donnie, Diva Montelaba isip Lally, Yassi Pressman isip Terry, Myra Carel (Jump In 1st runner up) isip Paula.

Ang mga banggiitan nga sila si Jean Garcia, Raymond Bagatsing ug  Cherie Gil dunay importanteng mga papel niining maong teleserye kauban usab sila si Emilio Garcia ug Ms. Caridad Sanchez.

Coco mag-producer

Gipadayag ni Coco Martin nga iyang i-check ang iyang skedyul sa higayon nga mahuman na ang serye niya nga  Minsan Lang Kita Iibigin gumikan kay nagplano siya nga mo-produce og usa ka indie film.

Jessy gidumtan sa Kimerald fans

Wala mabalaka si Jessy Mendiola sa nadawat niya nga report nga matud pa  nasuko kaniya ang Kimerald fans  tungod sa panagpares nila ni Gerald Anderson sa umaabot nga serye sa ABS-CBN.

Carlo busy sa negosyo

Walay kisaw ang showbiz career ni Carlo Maceda gumikan kay naka-focus kini karon sa iyang negosyo, ang pagpaabang og mga film equipment ngadto sa nagkadaiyang mga movie outfit.

Greta dili magpa-interview sa GMA

Wala magpa-interview si Gretchen Barretto sa dihang giduol siya sa reporter sa programang In The Limelight sa GMA News TV kung diin gipangayoan siya og reaksyon sa panag-uli nila ni Claudine ug igo ra kini mitubag og,  “Sorry, taga-ABS-CBN ako.”

Dance lessons sa Amerika nakatabang

Nagpa-enroll gyud diay si Enzo Pineda sa usa ka tunghaan sa Amerika aron mosamot kahanas ang abilidad niya sa pagsayaw ug mahimong epektibo ang pagkalakip niya sa programang Time of Your Life sa GMA-7.