Maricel nagparehab ra?

CEBU, Philippines - Naa ra matud pa nagtago sa usa ka rehabilitation facility si Maricel Soriano ug dili tinuod nga milupad na kini paingon sa London. Suma pa, nagpa-rehab si Maricel gumikan sa labihan nga depression. Lahi nga ngalan iyang gigamit.

JaBea may soap na

Tungod kay nagkadaghan ang supporters ug nagkasikat gyud ang loveteam nila ni Bea Binene ug Jhake Vargas nakahukom ang GMA-7 management nga hatagan sila og afternoon soap. Kini mao ang “Pahiram ng Isang Ina” diin makauban pud nila si Maxene Magalona, Luis Alandy, Marco Alcaraz, Antonio Aquitania ug Carmina Villaroel.

Kagustuhan ni Hayden

Gibutyag ni Dra. Vicki Belo nga ang iyang pamanhunon nga si Hayden Kho Jr. gyud matud pa ang namugos nga maghimo gyud sila og pre-nuptial agreement nga ang kwarta ug katigayonan karon ug sa umaabot sa sikat nga cosmetic surgeon wala siya’y labot niini. Apan kun unsa man gani ang iyang mapundar, silang duha ni Belo ang tag-iya.

Isalida sunod buwan

Isalida sa 40 ka mga sinehan nationwide ang pelikulang “Babae Sa Septic Tank” karong August 3. Ang maong pelikula nanghawod sa 7th Cinemalaya Awards Night niadtong Domingo lakip na ang paghatag niini og best actress trophy sa bida nga si Eugene Dominggo.

Lauren gimingaw’g sayo

Tulo ka semana na lang ang nahibilin para sa “Mula Sa Puso” sa dili pa kini matapos. Hinungdan nga karon pa lang gipadayag na sa bida niini nga si Lauren Young nga mingawon siya sa tanang cast ug nanghinaot na lang nga magkauban silang tanan sa mga proyekto sa umaabot.

Mugna ra ni Mo?

Dili gyud matud pa tinuod ang balita nga migawas sa milabay nga semana nga matud pa nagkabalik na sila si Mo Twister ug Rhian Ramos. Paukyab ra matud pa ni sa kampo ni Mo aron siya mahisgutan, sanglit uhaw og publicity ang nahisgutan.

Dako’g talent fee

Condo ug bag-ong sakyanan ang regalo ni Nadine Samonte sa iyang kaugalingon niining bag-o lang. Ang talent fee nga nadawat niya sa iyang kontrata sa TV5 para sa iyang bag-ong teleserye, ‘The Sisters” nga nagsugod na sa milabay nga semana, maoy iyang gibayad.

Kris ug Junjun nagtupad

Nagtupad og lingkod sila si Kris Aquino ug Makati City Mayor Junjun Binay atol sa State of the Nation Address ni Presidente Noynoy Aquino kagahapon nga gipahigayon sa Batasang Pambansa.

Kahinumduman nga na-link ang duha kaniadto apan kalit na lang kini nga nahilom.Misaad pa gyud si Kris nga maglikay na ni Binay tungod kay wala siya makauyon sa baruganan niini kabahin sa kaminyuon.

“Getting ready to go to SONA. I said on Kris TV abangan my escort, how sad, di na pwede si Vice Ganda. Sya pa naman kasama ko sana,” butyag ni Kris sa iyang Twitter account ug hayan maoy rason nganong nagkatupad na hinuon sila sa mayor.

Nagbaha usab kagahapon ang mga artistang politiko nga mitambong sa SONA nga naglakip nila ni Cavite Representative Lani Mercado uban sa iyang anak nga si Ina, Rep. Lucy Torres Gomez, OMB chairman Ronnie Ricketts, MTRCB chairperson Mary Grace Poe Llamanzares, kanhi Presidente Joseph Estrada ug ang iyang anak nga si Sen. Jinggoy Estrada.

Mitambong usab si Sarangani representative Manny Pacquiao uban sa iyang asawa nga si Jinkee Pacquiao. Ang attire ni Manny mugna ni Paul Cabral samtang ang pink Filipiniana ni Jinkee ginama ni Martin Bautista.

Gipangutana usab si Manny kung modagan ba siya og gobernador sa iyang probinsya sa sunod nga eleksyon apan daling nakatubag ang Pambansang Kamao og, “Malayo pa ang eleksyon.”

Namatay tungod sa ecstacy?

Usa sa gidudahang hinungdan sa kamatayon ni Amy Winehouse mao ang paggamit niini og ecstasy ug pag-inom og ilimnong makahubog. 

Kahinumduman nga patay na nga nakaplagan ang sikat nga pop star nga si Amy Winehouse sa iyang panimalay didto sa Camden, North London niadtong Sabado.

Giingong ang pagtumar og ecstasy maoy usa nga taud-taud na nga bisyo sa singer.

Hinuon suma pa sa kapolisan sa maong dapit nga dili una angay mohimo og espekulasyon samtang wala pa silay final nga resulta sa imbestigasyon.

Erich gikagubtan tungod ni Mario!

Trending topic sa Twitter si Erich Gonzales ug ang Star Cinema kagahapon gumikan sa balita nga ang young actress muhimo og pelikula kauban ang Thai actor nga si Mario Maurer ubos sa nahisgutang film outfit.

Naa sa ikaunom nga dapit ang Star Cinema ug ika-walo si Erich sa trending topics kagahapon sa hapon.

Daghan nga mga fans ni Erich ang mipadayag og kahinam sa maong balita kagahapon.

Kahinumduman nga sa Twitter account mismo ni Maurer niadtong July 8, gipahibawo niya nga muanhi siya sa Pilipinas sa dili madugay. Wala siya maghisgot ni Erich o sa posibling pelikula sa Star Cinema.

Samtang si Joyce Ramirez sa Publicity Asia, ang grupo nga maoy mudala ni Maurer dinhi sa Pilipinas miingon nga, plansahunon pa ang posibling pelikula sa ubos sa Star Cinema.

Miingon pud si Ramirez nga ang pagpili og leading lady ipahibawo human unya og basa ni Maurer sa script. Buot pasabot, dili pa sigurado nga si Erich gyud ang mamahimong leading lady.

Sunod semana gitakda nga mulupad si Ramirez paingon sa Thailand kauban ang mga representante sa Star Cinema ngadto kang Maurer.