Gwen may solo movie sa Indonesia

Hindi na rin pahuhuli si Gwen Zamora sa mga kasabayan niya o maging sa mga nauna nang mag-artista sa kanya dahil bida siya sa isang Indonesian movie. Isang buwan siyang magso-shooting para sa pelikula at magtatapos ang trabaho niya sa July 29.

Isang suspense thriller ito na ang role niya ay staff ng isang hotel na nalipat from Manila to Jakarta.

Dalawa na sila ni Christian Bautista na itinutu­ring na mga artistang Pinoy na gumawa ng pelikula sa Indonesia, kahit pa si Gwen ay isinilang at lumaki sa Australia.

Dito na sila naninirahan ng kanyang buong mag-anak at may matagumpay na negosyo sa tinapay ang kanyang pamilya.

Mga sumali sa show ni Pacman Hustler na sa mga game shows

Marami naman ang nagtatanong kung bakit kinakailangan pang idaan ng Pambansang Kamao na si Manny Pacquiao ang pagtulong sa mga nangangailangan sa pamamagitan ng kanyang bagong game show, ang Manny Many Prizes, gayung puwede naman siyang tumulong ng direkta. Mas madali at mas marami siyang matutulungan kung direkta niyang pupuntahan ang mga nangangailangan. Mapipili pa niya kung sino ang karapat-dapat.

Bagaman at marami ang talagang nangangaila­ngan na sumasali sa mga game shows, marami rin ang kundi man walang pamasahe para dumayo sa mga malalayong palistahan para makasali sa game show niya, kay Willie Revillame, sa Eat Bulaga at maging sa Happy Yipee Yehey ay ayaw makipagsapalaran sa pagpila sa mga palabas na nagbibigay ng pera. Ang nangyayari tuloy ay ‘yung mga professional game contestants na lamang ang laging napipili. Sila na ginagawang hanap-buhay ang pagsali sa mga game shows.

Maaring sa mga unang game shows niya ay mapili ni Manny ang mga contestants depende sa kanilang estado sa buhay at pangangailangan pero, baka sa karamihan ng sumasali ay baka kapusin sila ng panahon, hindi na sila mas­yadong makapili kapag nagtagal na ang show. Sana hindi mangyari ito.

TRO ng the sisters inaabangan

Totoo kayang ipati-TRO ng dating prodyuser ng Seiko Films na si Robbie Tan ang pag-ere ng The Sisters bukas, Lunes? Siya lamang daw ang may karapatan sa istorya nito dahil nabili na niya ito sa sumulat nito na si Rod Santiago nung isinapelikula niya ito.

Sana lamang ay bago ito sinimulang gawin para sa TV5 ay wala na itong problema sa nasabing producer at may akda. Masasayang lahat ng pagod ng mga nasa likod ng serye tulad ni Nadine Samonte na siyang inilulunsad sa serye, ang buong cast at ang bumubuo ng produksiyon nito kung hindi matutuloy ang pagsisimula nito bukas.

Heart at Daniel ni-record ang bakasyon

Mapapanood mamayang hapon sa Showbiz Central ang mga sweet moments nina Heart Evangelista at Daniel Matsunaga sa kanilang bakasyon sa Brazil. Lahat nito ay kinunan ng video para sa kapakanan ng mga taga­subaybay nila.

May feature naman sa mga loveteams nina Al­den Richards at Louise delos Re­yes at Jake Var­gas at Bea Bi­nene. Pumapa­pel nga ba si Enzo Pi­­neda kay Louise na nakakasagabal para sa tuluyang pakikipagtambal nito kay Alden? Sina Jake at Bea, meron din bang third party na humahadlang para mag­tagumpay ang kanilang loveteam? Alamin ang sagot mamaya.

Si Jennylyn Mercado, makita kaya ni Mind Master Nomer ang sinasabing pagbabalik dito ni DennisTrillo? Abangan din!

Personal

Pasasalamat na lamang kay G. Bobby Simbo­rio, Corporate Communications Of­­ficer ng Max Group of Companies sa ma­bilis nilang pagresponde sa aking hindi naging magandang karanasan sa kanilang branches, sa SM North Edsa at sa SM Sta Rosa, sa hindi nila malinaw na pagtanggap at pag­trato sa diskwento na ipinagkakaloob ng kanilang restoran sa mga tulad kong senior citizen.

Dalawang ulit nang nangyari sa akin ang mabigyan ng diskwento na hanggang ngayon ay hindi ko pa maintindihan at hanggang ngayon ay hindi pa rin nila kayang ipaliwanag sa akin.

I don’t mind the amount, ang gusto ko lang ma­linawan ay kung paano nila natatantiya kung magkano ang dapat maging kabawasan sa mga ibinabayad ko.

Tungkol naman sa serbisyo, alam kong madali n’yo itong malulunasan, naiintindihan ko na baka overwhelmed lang kayo sa rami ng kumakain sa mga oras na itinatakda n’yong magbigay ng “chicken all you can” promo.