Tunay na mundo ng idolo sisilipin!

MANILA, Philippines - Gusto ninyo bang malaman kung ano ang ginagawa ng paborito ninyong artista at personalidad sa araw-araw, sa harap at sa likod man ng camera? May make-up man o wala? Makisilip na simula ngayong Sabado sa pinakabagong docu-reality show sa telebisyon na tututok sa buhay ng mga sikat na personalidad sa bansa sa harap at likod ng kamera -- ang Follow That Star mula sa GMA News TV Channel 11!

Susundan ng Follow That Star ang tampok na artista o personalidad kada linggo saan man ito magpunta o ano man ang kanyang gawin. Mapapanood dito ang tunay na reaksiyon at emosyon ng paborito ninyong personalidad -- walang script at walang take two! Makikilala rin sa Follow That Star ang pamilya, kaibigan at mga kasamahan sa trabaho ng tampok na artista, kaya naman siguradong mas makikilala siya ng publiko sa pamamagitan ng programa.

Para sa pilot episode ng Follow That Star ngayong Sabado, tampok ang cute na cute na child wonder na si Jillian Ward! Nagsimula si Jillian bilang isang commercial model pero mas nakilala siya bilang bida sa drama show na Trudis Liit.

Kilalanin si Jillian Ward at alamin mula sa kanya kung masaya ba o masarap ang buhay ng isang child wonder.

Sumilip sa tunay na mundo ng mga artista at sikat na personalidad sa Follow That Star simula na ngayong Sabado, 7.55 p.m., sa GMA News TV.