Senior actress idedemanda ng young actress na sinampal

PIK : Puring-puri si AiAi delas Alas ng mga kaibigan niya sa press sa ipinakitang professionalism nito at tapat na pakikisama.

Pagod na pagod na siya nung nakaraang Sabado, dahil bukod sa finals sa nakaraang Pilipinas Got Talent, nag-taping pa siya at recording pagkatapos ng guesting niya sa concert ni Duncan Ramos sa Zirkoh Morato, Quezon City.

Kahit pagod na pagod ay kuwelang-kuwela ito sa pagpapatawa at paglalaswa kay Duncan sa huling bahagi ng show.

Hindi tipid ang performance kahit pakikisama lamang ’yun sa close friend niyang si Jobert Sucaldito na producer and director ng naturang show.

Kaya marami ang natuwa sa kanya sa mga magagandang itinanim na pakikisama sa mga kaibigang press at ilang artista.

PAK : Kuwento ng ilang kaibigang naka-base sa Amerika, naloka sila sa isang singer-actor nang dumalo ito sa isang event doon kamakailan lang kasama ang ilan pang kilalang artista ng network nito.

Magaganda ang mga kilalang aktres na nakakasabay niya pero tinalbugan niya ito sa foundation pa lang na na-apply sa mukha niya.

Kitang-kitang makapal ang foundation na inilagay para magmukha siyang fresh. Pero bakit mas bongga pa ang make-up nito kesa sa mga kilalang aktres na nakasabay niya?

Lalo tuloy siyang napagdudahang may bahid ng kabekihan na matagal nang naiisyu sa kanya.

Siya ba itong nakasabay ng isa ring kilalang aktor na pumunta ng ibang bansa para magbakasyon lang?

BOOM : Lumalala na ang usap-usapan tungkol sa dalawang kilalang aktres na nasangkot sa isyung sampalan sa eksena nilang dalawa.

Magkasama sila sa isang bagong drama series na kakaiba ang konsepto at tuwang-tuwa pa naman si younger actress at nakakasama niya si senior actress.

Pero nairita si senior actress kay younger actress kaya sa isang eksenang dapat batuhin ng bote (or itulak ba?), ang ginawa niya ay sinampal niya ito ng ubod lakas.

Hindi nakapaghanda si younger actress at nasaktan talaga ito. Hindi man lang nag-sorry si senior actress at basta na lang umalis pagkatapos ng taping.

Ang latest na narinig namin, pinag-isipan itong idemanda ni young actress dahil sa ginawa sa kanya. Para nga namang intentional dahil hindi man lang nag-sorry.

Paano kasi, nairita si senior actress sa kanya dahil maingay ito sa set.

Pareho naman silang magagaling na kontrabida kaya abangan na lang natin kung sino ang ’di uubra kanino.

Hintayin na lang natin kung saan ito hahantong.

Wala pa sa ere ang bagong drama series na ito, pero naiintriga na. Baka talbugan pa nila ang mga younger stars na bida rito!