Raymond ibinuking, Marian at Heart nag-away sa shooting

Naintriga ako sa balita kahapon ni Raymond Gutierrez na nag-aaway sa set ng Temptation Island sina Marian Rivera at Heart Evangelista.

May feeling ako na may bahid ng katotohanan ang balita dahil hindi ito sasabihin ni Raymond kung hindi siya sure sa impormasyon na nakarating sa kanya.

Halatang-halata rin na natigilan si John Lapus nang tanungin siya ni Raymond tungkol sa isyu. Alam ni John ang mga nangyayari sa set dahil kasali siya sa cast ng kontobersiyal na pelikula ng GMA Films at Regal Entertainment, Inc.

Second Kid Ni Carlene, Baby Boy

Magiging kuya na si Calix, ang lovechild nina Carlene Aguilar at Dennis Trillo. Big brother na ang bagets dahil baby boy ang ipinagbubuntis ni Carlene at ito ang magiging panganay nila ng asawang si Yo Ocampo.

Lumabas sa ultra sound test kay Carlene na lalaki ang bagets sa kanyang sinapupunan.

Huminto na muna si Carlene sa paglabas sa TV dahil ang pagbubuntis ang kanyang priority.

Baka mapadalas ang paghiram ni Dennis kay Calix kapag nagsilang ng second baby si Carlene.

Manny mamimigay ng maraming premyo

Manny Many Many Prizes ang title ng bagong show ni Congressman Manny Pacquiao sa GMA 7.

Sina Isabelle Daza at Rhian Ramos ang mga co-hosts ni Manny sa Manny Many Many Prizes. Sa title pa lang, obvious na maraming premyo ang ipamimigay ng inaabangan na bagong show ni Manny.

The Second Saga, Encantadia ibabalik pa rin

May plano pa rin ang Kapuso Network na ibalik ang Encantadia na bibigyan ng title na Encantadia: The Second Saga.

Marami kasi ang humihiling sa management na ibalik ang top-rating primetime show noon ng GMA 7.

Kapag ibinalik ang Encantadia, malamang na hindi na kasali si Karylle, isa sa mga original stars ng show dahil talent na siya ng ABS-CBN. Matagal din na mawawala si Karylle dahil four months siya sa Singapore para sa taping ng TV series na The Kitchen Musical.

‘Mahihirapan sa akin si Nomer’

Hooked ako kahapon sa panonood ng Showbiz Central dahil sa husay ni Nomer Lasala, ang psychic na kilala bilang mind reader dahil nahuhulaan niya ang nasa isip ng isang tao.

Naloka ako kay Nomer dahil kung ano ang iniisip kahapon ni Louise delos Reyes, nahulaan niya ng walang labis, walang kulang.

Kakaiba ang talent ni Nomer pero kung ang mga iniisip ko ang kanyang huhulaan, mahihirapan siya dahil magulo ang utak ko ’noh! Malilito lamang siya dahil marami akong iniisip.

Pumapalo ang live ratings ng Showbiz Central kapag si Nomer ang nakasalang dahil interesadung-interesado sa kanya ang mga manonood.

I’m sure, darami na ang maghahanap sa mind reader at hihingi ng tulong para malutas ang kanilang mga problema.

Pambihira ang God-given talent ni Nomer. Walang daya ang kanyang ginagawa dahil hindi niya nakakausap ang mga artista na hinuhulaan. Pang-Guinness Book of World Records ang talent ni Nomer na may sariling website, ang www.nomerlasala.com.