Alicia, Geneva, Yasmien alang sa "Sexiest vegetarian"

CEBU, Philippines - Dako og kahigayonan sila si Alicia Mayer, Geneva Cruz, Yasmien Kurdi, ug kanhi Eat Bulaga host Lougee Basabas nga mudaog sa Asya sa nagpadayong tinuig nga Sexiest Vegetarian Celebrity contest nga gipasiugdahan sa People for the Ethical Treatment of Animals (PETA).

Uban pang mga pambato sa Pilipinas ang mga models nga sila si Isabel Roces ug Raya Mananquil ug mga artista nga sila si Chin-Chin Gutierrez, Juliana Palermo, Carlos Agassi, ug Raymond Bagatsing.

Samtang ang mga nag-una gikan sa laing kontinente mao ang mga singers nga sila si Anthony Kiedis (of the Red Hot Chili Peppers) ug Leona Lewis; mga artista nga sila si Hayden Panettiere, Natalie Portman, Milo Ventimiglia, Maggie Q, ug Tobey Maguire (aka Spider-Man).

Padayon pud nga nakigtigi ang Taiwanese singer ug actress Barbie Hsu, sa sikat kaayo kaniadto nga Meteor Garden; ug ang fighting champion nga si Jake Shields.

Baron dunganon ang rehab ug trabaho

Balik showbiz na ang kontrobersyal nga aktor nga si Baron Geisler human sa dul-an lima ka buwan nga pagsulod niya sa usa ka rehabilitation facility gumikan sa iyang problema sa alcohol o ilimnong makahubog.

Si Baron mismo maoy mipahibawo atol sa usa ka fashion show niadtong Miyerkules sa gabii diin usa siya sa mga mirampa, nga kasamtangan niyang gihimo karon ang remake sa sikat nga pelikula ni kanhi presidente Joseph Estrada, ang ‘Asyong Salonga.”

Sidekick matud pa siya sa bida sa maong pelikula, diin ang pag-umangkon ni Erap nga gobernador sa Laguna, J.V. Ejercito maoy producer niining big-budgeted remake ug si Tikoy Aguiluz ang direktor.

Walay ideya si Baron giunsa siya pagpili, basta kay nag-ampo lang matud pa siya ug gitubag sa Ginoo ang iyang pangaliya, tungod kay siya maoy gikuha sa producer ug director sanglit kumbinsido sila nga haom ang aktor sa maong role.

Samtang wala pa mahuman ni Baron ang iyang unom ka buwan nga rehabilitation, apan gitugtan lang matud pa siya nga makatrabaho na samtang ipadayon ang iyang rehab program sa samang higayon.

Gipasalig niya nga lahi nga Baron na matud pa siya karon sanglit mas lig-on na ang iyang pagsalig sa Ginoo, ug nanghinaot siya nga mulungtad na gayud ang iyang lig-on nga pagtuo sa Kahitas-an ug dili na siya mahisalaag pa.

Kahinumduman nga nakontrobersyal si Baron human mireklamo ang iyang co-star   sa “Noah” nga si Cherrie Pie Picache sa milabay nga tuig nga gikumot matud pa sa aktor ang iyang dughan atol sa usa nila ka eksena.

Elmo ug Sam pambato sa miley concert

Gikumpirmar sa concert producer nga si Marvin Agustin nga sila si Elmo Magalona ug Sam Concepcion maoy mga front act sa umaabot nga concert ni Miley Cyrus dinhi sa nasud karong June 17 sa SM MOA Concert Grounds. Si Miley maoy nagpasikat sa awit nga “The Climb”, “Party In the USA” ug uban pa.

Nameligro nga relasyon?

Hugtanong gihimakak ni John Prats ang taho nga matud pa nagbuwag na sila sa singer nga si Rachelle Ann Go. Gipadayag usab niya nga dili tinuod ang report nga matud pa duna sila’y espesyal nga relasyon sa kauban niya sa programang Happy Yipee Yehee nga si Bianca Manalo.

16th monthsary sa Melason

Giselebrar kagahapon nila ni Melisa “Melai” Cantiveros ug Jason Francisco ang ilang 16th monthsary sa ilang relasyon. Ang duha nag-dinner sa usa ka restaurant sa Quezon City.Samtang gikatakdang molarga sila si Melai ug Jason sa Amerika karong Agosto alang sa usa ka show. Ang duha nangandoy usab nga makatikang sa Disneyland sa maong nasud.

Utol giuswag sa september

Nakadesisyon ang management sa TV 5 nga iuswag ang airing sa Ang Utol Kong Hoodlum. Karong buwana unta kini ipasalida apan iuswag na lang kini ngadto sa September. Suma pa sa gi-tweet sa entertainment department head sa TV 5 nga Perci Intalan nga gituyo kini sa network isip pagrespetar sa orihinal nga bida sa movie version sa Ang Utol Kong Hoodlum nga si Robin Padilla kinsa dunay serye karon sa ABS-CBN nga Guns and Roses.

Alakim nag-atubang og suliran

Nakabsan sa kinabuhi ang pito ka buwan nga bata nga naa pa sa sabakan sa kapikas sa sikat nga magician nga si Alakim. Nanawagan si Alakim sa publiko nga iampo usab ang iyang asawa nga naa karon nalandig sa Intensive Care Unit sa St. Luke’s Hospital ubos kritikal nga kondisyon.

Safe na ang sex video

Luwas na pagkakaron ang sex video ni Jennifer Lopez human siya midaog sa iyang giduso nga injuction aron mapugngan ang iyang kanhi bana nga si Ojani Noa pagbaligya niini. Ang video gitrangkahan pagkakaron sa usa ka safe deposit box sa usa ka bangko didto sa California, diin ang abogado niya maoy naggunit sa yawi.

Julia mahadlok di na musikat

May kabalaka si Julia Montes basin dili na siya musikat sa higayon nga hingpit nga buwagon na ang ilang panagpares ni Kathryn Bernardo nga labihan kaayo ka malampuson sa bag-o pa lang nahuman nga teleserye, ‘Mara Clara.” Kini tungod kay ang kontrabida kanunay gyud matud pa nga kalagutan sa publiko. Ang duruha subling mubaling sa telebisyon pinaagi sa youth-oriented show “Growing Up” kauban sila si Diego Loyzaga ug Albie Casiño.

Pacman ug Paris textmate

Subling gihisgutan sa socialite ug hotel heiress Paris Hilton ang boxing champ nga si Rep. Manny Pacquiao sa iyang pag-guest sa late night show sa America, “Jimmy Kimmel Show,” diin mikanta si Pacman kaniadto ug nakontrobersyal dihang matud pa kauban niini si Krista Ranillo sa iyang pagbiya sa TV station. Matud ni Paris textmate sila ni Pacman ug excited na siya nga subli kining mahimamat ug ang asawa niining si Jinkee nga iyang gihulagway nga “ very sweet.” Gitakdang mubisita si Paris sa Pilipinas human mibukas ang iyang boutique sa Davao sa milabay nga buwan.

Marie ganahan ni James

Bukas si Marie Digby sa usa ka relasyon tungod kay single matud pa siya karon, apan giklaro niya nga “getting to know” level pa lang sila ni James Yap, ug dili tinuod nga nag-date na sila. Kanunay lang matud pa sila magkita sa mga functions ug para niya maayong tawo ang basketbolista.