Sa Internet lang nalaman ang pagpapalit, Bianca hindi na pala 'Sentensyada'

Last Saturday lang bumalik si Nadine Samonte mula sa pagbabakasyon sa Singapore, kaya wala siya sa launching ng The Black Book ng GMA Artist Center (GMAAC). Nakaligtas din siya sa paghahanap sa kanya ng press para masagot ang tsikang iiwan na niya ang GMA Network at lilipat kundi sa ABS-CBN ay sa TV5.

Sabi, kay Piolo Pascual siya ipapareha ’pag sa Dos siya pumirma at sa Singko naman ay may nakahanda na siyang project kasama ang magaling at sikat na aktres. Kung tutuusin, puwede nang lumipat sa mapipiling network si Nadine dahil noong May 3 pa nag-expire ang kontrata niya sa GMAAC, kaya freelancer ang status niya ngayon.

Pero bago pumirma ng kontrata sa iba, mimitingin muna si Nadine ng home network niya at kung maayos ang usapan, baka Kapuso pa rin siya. Ngayon pa ba nila pakakawalan ang aktres, ang husay nito sa My Lover, My Wife at kaya niyang magbida at magkontrabida?

* * *

Nakita namin si Daniel Matsunaga sa GMA Studio, sa shooting ng Temptation Island, akala namin guest ito sa movie ng Regal Entertainment, Inc. at GMA Films, ’yun pala dinalaw lang ang GF niyang si Heart Evangelista na sexy ang suot that night dahil beauty pageant scene ang kinunan ni Direk Chris Martinez.

Nakabantay si Daniel sa aktres na mabuti at hindi ipinagbabawal sa set, sabagay hindi naman nakakaabala sa shooting si Daniel na balita namin, sa June 20 na ang alis nila ni Heart for Brazil para ipasyal ang aktres sa pinangga­lingan niyang bansa. 

Nalilito pala kami sa gagawing pelikula nina Heart at Daniel dahil ang sabi ay sa Metro Manila Film Festival entry na Ho To Tai o Hototay na Mano Po 7 sila lalabas. May nagsabi namang love story ang gagawin ng dalawa at si Mother Lily Monteverde pa ang nakaisip ng title. O baka naman pareho nilang gagawin ang two movies.

* * *

Nagulat ng bahagya si Jake Vargas sa balitang namatay ang manager niyang si German Moreno pero tinawanan lang niya bago pa siya maniwala dahil kausap niya sa phone si Kuya Germs. Iniisip din ng young actor kung bakit kumalat ang maling balita at ano ang motibo nang nagpasimuno.

Anyway, mukhang hindi na makakasama si Jake sa US dahil kainitan ng taping ng Captain Barbell at nagsu-shooting pa siya ng Tween Hearts the Movie: Class of 2012. Kung nag-a-action siya sa Captain Barbell, magpapa-cute at kakanta siya sa first movie nila ni Bea Binene.

May duet din sila sa OST o Original Soundtrack ng movie at ito’y ang Kaba at Langit. Nag-recording na sila gaya ng ibang cast ng movie.

* * *

Hindi na raw Sentensyada ang title ng bagong soap ng GMA 7 na tampok sina Dennis Trillo, Bian­ca King, Polo Ravales, at Alessandra de Rossi. Pina­litan na ito ng All Mine to Give na pati si Bianca ay nagulat dahil sa Internet lang nalaman ang bagong pa­magat.

Sabi ng press, parang lumang title ang All Mine to Give, at mas gusto nila ang Sentensyada. Ano naman kaya ang say ng direktor nitong si Don Michael Perez?

Ngayon lang namin naisip na in real life, mag-ex sina Alex at Polo, pero friends sila and hopefully, hindi mag-aaway sa taping. Sina Dennis at Bianca ang virgin love team dahil ngayon lang magtatambal talaga. Naurong sa June 13 ang airing ng soap.