Iwa wala na sa puso ang dyowa

PIK : Nag-shave na si Dingdong Dantes ng kanyang makapal na bigote dahil tapos na ang I Heart You Pare.

 Matagal-tagal din siya sa ganung ruggedly handsome look at natutuwa siya dahil may souvenir naman siya sa look na ’yun na lumabas sa latest issue ng Men’s Health na kung saan siya ang nasa cover.

Bale pangatlong beses na itong nasa cover ng Men’s Health si Dingdong kaya proud naman siya dahil talaga namang pagdating sa kalusugan at sa pa­ngangatawan ay hindi ito nagpapabaya.

Sa pelikula muna magko-concentrate ngayon si Dingdong dahil wala pa namang sinasabi sa kanya kung anong susunod na drama series ang gagawin niya.

Ang dinig namin, si Heart Evangelista ang susunod niyang makakatambal pero wala pang kumpirmasyon.

Excited ang aktor sa pagbabalik niya sa hosting dahil merong bagong talent-reality search na sisimulan ang GMA 7 at siya ang maghu-host.

PAK : Sa June 11 ay may mahalagang announcement si Alfred Vargas para sa kanyang mga tagasubaybay.

Matagal na niya itong pinaghahandaan na tingin nito’y dapat nang sabihin sa lahat.

May kinalaman ito sa kanyang personal na buhay na sinasabi nga niyang matagal din niyang nakaligtaan dahil sa rami ng ginagawa niya bilang konsehal ng District 2 ng Quezon City at naging abala rin siya sa Mutya.

BOOM : Gusto nang mag-concentrate ni Iwa Moto sa trabaho pagkatapos niyang masangkot sa malaking gulo dahil sa pag-ibig.

Nakipag-usap na siya sa GMA Artist Center (GMAAC) at hindi naman siya sinabihang suspended ito o naka-freeze muna ang kanyang career.

Humihingi lang ito ng paumanhin sa lahat na nadamay sa gulo nila ni Mickey Ablan lalo na sa Andres de Saya na inaasahan niyang makababalik pa siya roon.

Sagot ni Iwa sa sinasabi ni Mickey na makipagbalikan sa kanya: “Hindi ko alam. Time will tell. Wala akong maisasagot, pagdating ng panahon kung kami o hindi, basta ngayon magtatrabaho lang ako.

“Tungkol sa relasyon, sa love life ko, ako na lang, akin na lang ’yun. Wala siya ngayon sa puso ko. Wala siya ngayon sa akin, nandun siya sa family niya. Mag-ingat siya, alagaan niya sarili niya, alagaan niya si Ysabel. Ako, nandito ako sa GMA 7, para sabihing ‘I’m back to work.’”