San Fran's Soli-soli festival 2011 by Dennis Tanoc

CEBU, Philippines - Sikat ang lungsod sa San Francisco nga anaa mahimutang sa Camotes Islands tungod kay mao kini ang gitawag og “The Exemplary LGU” sa tibuok lalawigan sa Sugbo human malangkat niini sa kaduha nga higayon ang titulo nga Grand Champion sa gipasiugdahang programa sa kagamhanan sa probinsya ug sa Ramon Aboitiz Foundation Inc. (RAFI) nga mao ang “Expanded Green and Wholesome Environment that Nurtures” kon E-GWEN Program.

Sikat usab kining maong lugar tungod sa iyang natural attractions sama sa Lake Danao nga mao ang labing dako nga linaw sa tibuok Visayas.

Palibot sa maong lake adunay mga mitubo nga usa ka matang sa sagbot nga gitawag og soli-soli. Ang maong mga sagbot dako kaayo og natampo sa mga taga San Francisco kay tungod niini makamugna sila og mga produkto sama sa banig, bag, kalo ug daghan pa.

Gumikan usab namugna ang Soli-Soli Festival isip pahinungod ug pasidungog sa kaayohan nga natampo sa nahisgutang sabot ngadto sa lungsod. Ug niadtong Marso 20, 2011, gipahigayon ang ika-10 nga tuig sa pagpahigayon sa maong festival, usa sa mga dakong kalihukan alang sa kapistahan sa maong lungsod pahinungod kang Señor San Jose.

Ang maong festival gisalmutan sa kabataan ug mga kabatan-onan sa maong lungsod gikan sa elementarya ug hayskul nga magsul-ob og mga costumes ug magbitbit og props nga ginama o gi-adornohan og soli-soli.

Ang pagsayaw sa soli-soli adunay tulo ka basic steps: pagpananom sa soli-soli, pag-ani sa soli-soli, ug ang pangaliya sa Kahitas-an tungod sa bililhong gasa nga mao ang mga soli-soli.

 Lab-ason usab ang sinugdanan sa Lake Danao.

Ang street dancing parade maoy mibukas sa Soli-Soli Festival nga nanukad sa SanFran Baywalk. Napulo ka grupo ang misalmot.—lima alang sa Secondary Category ug lima gikan sa Elementary Category.Gitapos ang street dancing sa San Francisco Central School diin gisugdan usab dayon ang panagtigi sa Ritual ug Showdown.

Unang misayaw ang mga grupo gikan sa Secondary Division diin ilang gisayaw ang Soli-Soli Based Category.

 Ug human sa pagtimbangtimbang, nakab-ot ang hukom nga gipadayag ni chairman of the board of judges Vince Escario,

 Alang sa Free Interpretation Category (Elementary Division), Champion ang Pundok Cabunga-anl, First Runner Up ang Pundok Uniores, Second Runner Up ang Pundok Kan-insing. Samtang sa Soli-Soli Based Category (Secondary Division), Champion ang Pundok Kabataan sa Daanglungsod, First Placer ang Pundok Timubo, ug ang Pundok Pag-ambakan mao ang nahimong Second Placer!

Sama sa sagbot nga soli-soli nga padayong nanubo sa Lake Danao sa Lungsod sa San Francisco, ang maong lungsod usab padayong mitubo ug milambo pinaagi sa pagpaningkamot sa mga opisyales niini ingon man sa mga katawhan mismo.

Salamat sa tanang taga San Francisco, ilabi na sa maabi-abihon kaayong mga opisyales: Mayor Aly Arquiliano, Vice-Mayor Al Arquiliano, SB Members, Mayor’s Staff, Tourism Office Staff nga gipangulohan ni ma’m Christy Gok-ong.