Pagkatapos mapanood ang Royal wedding Aiai nangangarap ikasal sa simbahan

Tulad ko, maraming Pinoy stars ang tumunganga sa harap ng TV at pinanood ang royal wedding nina Prince William at Kate Middleton.

Ilan sa mga nanood sina AiAi delas Alas at Ri­chard Gomez. Hindi pa nararanasan ni AiAi na makasal sa simbahan kaya nangangarap ang comedien­ne na darating ang araw na magmamartsa siya sa simbahan at naghihintay sa harap ng altar ang kanyang future groom.

Pictorial nina Shalani at Liz inilihim?

Nanghihinayang ako dahil hindi ko napakunan sa Startalk ang pictorial ni Shalani Soledad para sa Preview magazine.

Alam ko na may pictorial si Shalani pero hindi nasabi sa akin na si Liz Uy ang stylist. News ang pagsasama ng dalawa dahil ex-girlfriend ni P-Noy si Shalani at niligawan niya ang kanyang dating stylist na si Liz.

Napanood ko na lang sa 24 Oras ang video ng pictorial ni Shalani habang naka-assist sa kanya si Liz.

Baka naman talagang inilihim ng Preview staff ang pictorial para hindi ito puntahan ng mga miyembro ng media?

Si Shalani ang cover girl ng May 2011 issue ng Preview magazine at mabibili na ito sa mga magazine stand at bookstore.

Aj Perez nagplano pang magpa-manage kay Jojie Dingcong

Ikinuwento sa akin ni Jojie Dingcong na tinawagan pa ni AJ Perez ang kanyang assistant ilang minuto bago namatay sa isang vehicular accident ang bagets.

Pamangkin pala ni Jojie si AJ kaya type nito na ipa-manage ang career sa kanyang uncle. Talent si AJ ng Star Magic at gusto niya na maging co-ma­n­ager si Jojie.

Nabanggit din ni Jojie na nagising siya na umiiyak noong Biyernes ng umaga dahil kay AJ. Bigla raw niyang naisip ang pumanaw na pamangkin.

Si Jojie ang manager nina Derek Ramsay, Matteo Guidicelli, Edward Mendez at Bianca Manalo at consultant siya ni Dra. Vicki Belo sa Belo Medical Clinic.

Pacman isinisingit ang taping kahit nag-eensayo

Hindi lamang ang coverage ng laban nina Manny Pacquiao at Sugar Shane Mosley ang pagkakaabalahan ni Enzo Pineda sa kanyang US trip dahil may taping din doon para sa episode ng Show Me Da Manny.

Hindi ito ang first time na nag-taping sa Los Angeles at Las Vegas ang mga artista ng sitcom ni Manny sa GMA 7. Ginawa na nila ito noon dahil sinamantala nila ang mga libreng araw ng Pambansang Kamao.

‘Kung sinuman si Megan, hindi siya mabu­ting tao dahil nagagawa niya na magpanggap at manloko ng kapwa.’

May nagsabi sa akin na Megan ang name ng hitad na administrator ng fake Lolit Solis Twitter account na nilagyan niya ng litrato namin ni Ricky Lo.

Ang claim daw ni Megan, writer siya pero gusto kong ipaalam sa lahat na hindi ko siya binigyan ng permiso na gamitin ang pangalan ko sa Twitter. Lalong wala akong kinalaman sa totoong_Ina twitter account na kanyang inimbento at ginagamit para makapanloko ng mga artista.

I repeat, wala akong Twitter account, hindi ako ang may-ari ng totoong_ina Twitter account at walang permiso si Megan na gamitin ako sa mga pang-ookray niya. 

Kung sinuman si Megan, hindi siya mabuting tao dahil nagagawa niya na magpanggap at manloko ng kapwa.