Sigurado nang mu-rate

CEBU, Philippines - Gipaabot nga taas gyud kaayo ang rating sa Maalaala Mo Kaya episode ugma sa gabii sa ABS-CBN, sanglit kini maoy katapusan nga acting project ni AJ Perez, ug matud pa sa production “greatest performance” kini sa nahisgutan isip actor.

Congratulations

Second wedding anniversary nila ni Judy Ann Santos ug Ryan Agoncillo kagahapon. Pagka paspas sa panahon.

Ayayay Aiko!

Gikuyugan sa mga mayor sa nagkadaiyang lungsod sa Bulacan si Mayor Patrick Meneses kagahapon sa pormal na niya nga pagpasaka og reklamo batok sa iyang ex-girlfriend nga si Aiko Melendez gumikan matud pa sa pagdaot niini sa iyang kadungganan.

Followers ni  Anne mag-1M na!

Gipaabot nga dili madugay muabot na og 1 million ang Twitter followers ni Anne Curtis. Pagkakaron, dunay 994, 651 nga nagsunod sa iyang mga tweets kada minuto.

PGT sa taman

Dili mawagtang ang Pilipinas Got Talent sa ere sa higayon nga mahuman na ang Season 2. Kini tungod kay musunod dayon ang Season 3, isip paagi nga maharos sa ABS-CBN ang weekend primetime rating.

5th Huniño “Night of many firsts”

Nila ni Ryan Mark ug Sanden Anadia | Photos by Aldo Nelbert Banaynal

Una mao nga lahi sa milabay nga upat ka tuig, labing una karong higayon nga minus one ang accompaniment sa tanang interpreters ug dili live orchestra.

Ikaduha mao nga lahi sa naandan, 15 ka finalists ang nagtigi karong tuiga, sukwahi sa unang upat ka tuig nga 12 ra maoy nag-ilog sa titulo.

Ikatulo mao nga, sukwahi kaniadto dili celebrity ang guest performer, kundili ang garbo sa Sugbo ug nanghawod na sa mga kompetisyon abroad nga University of the Visayas Chorale.

Ikaupat mao nga human sa daghang mga katuigan, subling nadungog ang mananoy nga tingog sa Basilica del Sto. Niño Pipe Organ, pinaagi sa hugyaw nga paggitik sa bantugang pianist nga si Professor Armando Salarza.

Ug ang ikalima mao nga sa labing unang higayon, human sa upat ka tuig, wala mag-uwan, ni mitaligsik man lang.

Sayon Kantahon

Luyo niining tanan, dili malimod nga hugyaw gayud ang 5th Huniño diin ang awit nga “Viva Senor Santo Niño” nga gihatagan og kinabuhi ni Irene Abadiez ug mugna nila ni Dr. Fe Lyn Tampon ug Janice Warnack ang grand prize winner.

Si Abadiez kinsa band vocalist, mitug-an nga ikatulo na niyang higayon nga misalmot sa Huniño, ug karon pa gyud nakadaog ang iyang gi-interpret nga kanta. Wala gyud matud pa siya magdahom nga mudaog ug igo lamang niyang gihalad ngadto sa Balaang Bata ang iyang performance.

Samtang nagdagan ang mga adlaw, giangkon ni Abadiez nga migahin usab siya og oras dili palang dugay sa usa ka kalihukan sa simbahan partikular na sa Parokya sa Guadalupe.

Siya maoy midalit og awit sa eksena sa “Pieta” sa Grand Sugat sa Guadalupe 2011.

“Mao gyud to akong panaad, nga mo-offer gyud ko sa akong talent. Bahalag sa Carcar ko nagpuyo, moadto lang gyud ko sa Guadalupe kay misaad man ko nga mo-serve gyud ko niya (Our Lady of Guadalupe),” nagkanayon si Abadiez sa Banat News Hugyaw.

Samtang ang composer nga si Dr. Tampon misaysay nga makahuloganon kaayo ang maong awit sanglit maka-relate niini ang kadaghanan.

“Ang awit nga Viva Senor Santo Niño nagpakita sa hugot nga pagtuo sa mga tawo ngadto sa Balaang Bata,” nagkanayon si Dr. Tampon.

Ingon niini usab ang panlantaw sa mga hurado. “It’s easy to sing and the message of the song is nice,” nagkanayon si Professor Roberto de Rosario, ang board chairman nga nahinabi sa Banat News Hugyaw.

Second prize winner ang awit nga “Santo Niño Luwasa Ako” nga mugna nila ni Russel Alegrado ug Allan Sorono ug gihatagan og kinabuhi ni 2011 Sinulog Idol finalist Simeon Philip Mancol.

Third prize winner ang awit nga “Akoy Iyo Señor Santo Niño” nga mugna ni James Nino Banares ug gi-interpret ni Robert Bernadas.

Gipadayag ni Bernadas nga hilig na gyud siya mosalmot og mga singing contest gani ikapito na siya ka higayon nga mi-interpret og mga original songs.

“Ikaduha nako miapil og Huniño, kadaghan na pud ko kaapil og Cebu Pop Music Festival.  Actually second choice raman ko, kay wala man madayon ang unang gipili sa composer. Wala pud ko kabalo kung unsa ang hinungdan,” suma pa ni Bernadas.

Best interpreters sila si Rhea Mae Senining Judilla, Rhina Rose Senining Echivarre ug Rona Eve Senining Echivarre nga miawit sa “Make Me Follow You,” ni Jay arr Librando.

“Among gibuhat kay kalma lang gyud mi sa stage . Dako sad kaayo og natabang ang one month namo nga preparation ,” suma pa ni Rhea Mae.

Nakadawat og P50, 000 cash ang grand prize winner, P30, 000 ang second, ug P20, 000 ang 3rd, samtang P5,000 ang best interpreter. May consolation prizes pud ang wala makadaog.

Suma pa ni Rev. Fr. Rodolfo A. Bugna,OSA nga ang tumong sa Huniño mao ang pagdayeg ug pagpakita sa dakong pagtoo sa kahitas-an pinaagi sa kanta.

Dugang pa niya nga ang tanang komposisyon nagpakita sa mga kaayohan nga nahatag sa balaang bata.

As usual undanon ug makalingaw ang mga hosts nga sila si Mary Rose Maghuyop Villacastin ug Fr. Dan delos Angeles kansang adlibs nakadawat masipang pakpak gikan sa sinugdanan hangtud na sa pagkahuman sa panagtigi.

Samtang mapalit na ang CD sa 5th Huniño nga mugna sa Soundtraxxx Production Studio diha sa Sto. Niño Store sa Basilica sugod karong adlawa. (BANATNEWS)