Aiko sa Bulacan kakasuhan ngayon!

Nakausap ko kahapon si Pandi, Bulacan Mayor Enrico Roque at siya ang nagkuwento sa akin na ngayon siya magsasampa ng kaso laban kay Aiko Melendez.

Kasabay ni Papa Enrico sa pagdedemanda si Bulacan Mayor Patrick Mene­ses. Nagpasya si Papa Enrico na kasuhan si Aiko para mahinto na ang mga paninira sa kanya sa e-mail.

Matagal ko nang kakilala at kaibigan si Papa Enrico kaya hindi ako naniniwala sa mga paninira laban sa kanya.

Nanay ni Shalani kitang-kita ang Kaligayahan

Mahaba ang tulog ko noong Martes ng hapon dahil pinaghandaan ko ang surprise birthday party para kay Shalani Soledad.

Kung hindi ako maghapon na natulog, aantukin ako at tatamarin na pumunta sa Gazebo Royale.

Nine ng gabi ang imbitasyon sa surprise asalto kay Shalani kaya tumambay muna ako sa parlor ni Bambbi Fuentes hanggang 7:00 pm.

Eksaktong 8:00 p.m. nang umapir ako sa Gazebo Royale at as usual, ako ang pinakamaagang dumating sa mga invited guest.

Naabutan ko doon ang madir ni Shalani na si Evelyn na halatang excited para sa first showbiz birthday party ng kanyang anak. May photo booth sa entrance ng Gazebo Royale dahil ang mga litrato ng mga bisita ang souvenir mula sa organizer ng party, ang Will Productions ni Willie Revillame.

Siyempre, magkasama kami ni Evelyn na nagpakuha ng litrato. Kung hindi alam ng mga tao na si Shalani ang may kaarawan, iisipin nila na si Evelyn ang nagdiriwang ng birthday.

Bumaha ang pagkain at drinks sa party para kay Shalani na clueless na clueless sa sorpresa na inihanda ng kanyang Willing Willie family.

Inimbitahan ako ni Shalani sa dinner sa Taste of LA noong Tuesday night pero nag-beg off ako dahil alam ko nga ang surprise party sa Gazebo Royale at dito kami nagkita-kita nina Boss Vic del Rosario, Papa Manny Villar at TV5 bossing Bobby Barreiro.

Invited sa party si TV5 President Ray Espinosa na ka-birthday din kahapon ni Shalani pero hindi ko na nahintay ang kanyang arrival.

Nag-enjoy ako sa party dahil sa lahat ng mga bisita, ako ang nakapag-uwi ng pinakamaraming give-aways. May mga sabon, toothpaste, shampoo, deodorant at kung anik-anik pa.

Nakinig ako sa interbyu kay Shalani ng mga TV crew. Kung ano ang tanong, ‘yun lang ang sinagot ni Shalani kaya puro tungkol sa kanyang birthday ang topic sa mga interview sa kanya.

Nakamasid lamang si Evelyn habang nagpapainterbyu ang kanyang anak at feel na feel ko ang happiness niya sa magagandang nangyayari ngayon sa career ni Shalani.

Missing na kasama ni Pilar Pilapil maraming kinakaharap na kaso

Kumbinsido na rin pala si Pilar Pilapil na may kinalaman ang pamangkin ng mister niya sa tangka na pagpatay sa kanya.

Heto na ang nakakalokang parte. Nakipag-ugnayan sa mga pulis ang isang babae na hindi muna nila pinangalanan. Ang sey ng babae, biktima siya ng pagnanakaw ni Rosel Penas noong mamasukan ito sa kanya.

Si Rosel ang missing companion ni Pilar at siya ang kasama ng aktres nang harangin ng dalawang lalake ang kanilang sasakyan sa Marikina City noong April 15.

Pinagsasaksak si Pilar na nakaligtas sa kamatayan dahil nagpanggap siyang patay. Mula noon, hindi na natagpuan si Rosel na involved pala sa mga anomalya at suspect na ngayon ng mga pulis sa tangkang pagpatay kay Pilar.